هەرێم: بارانبارین دەستپێدەکات و پلەکانی گەرما زیاتر دادەبەزن

BBC

بارانبارین

کەشناسی هەرێم پێشبینی  دەستپێکی شەپۆلێکی بارانبارین دەکات، کەبەهۆیەوە زیاتر پلەکانی گەرما دادەبەزن، بەڵام بەهۆی بارانەکەوە بەستن و شەختە کۆتایی دێت.

بەڕێوەبەرایەتیی گشتیی کەشناسی هەرێم بڵاویکردوەتەوە، ئه‌مڕۆ یه‌كه‌م رۆژى ساڵی نوێ، ئاسمانی هەرێم هەوری تەواو دەبێت‌و کاریگەریی شەپۆلی بەفربارین بەردەوامدەبێت لەسەر ناوچەکانی سنوری پارێزگای دهۆک، ئیدارەی سەربەخۆی زاخۆ، مێرگەسور، ئامێدی، سنوری ئیدارە سەربەخۆکانی سۆران‌و ڕاپەرین‌و چیای سەفین لەپارێزگای هەولێر لەناوچەکانی دیکەش باران دەبارێت.

هاوکات راشیگەیاندووە، ئه‌مڕۆ پێنجشەممە کەشوهەوای هەرێمی کوردستان تاڕادەیەک جێگیر دەبێت، سبه‌ینێ هەینی ئەگەری هەیە لەناوچە شاخاوییەکان بەفرو باران ببارێت‌و شەپۆلێکی نوێی بارانبارینیش ڕوو لەهەرێمی کوردستان بكات، بەو هۆیەوە پلەکانی گەرما نزمدەبنەوەو لەناوشارەکان کۆتایی بەبەستەڵەک‌و شەختەبەند دەهێنێت، ئەمەش دەبێتە یەکەم شەپۆلی دەریای سپی لەساڵی نوێداو دەبێتە هۆی بارانبارینى پچڕ پچڕ لەناوچە جیاوازەکاندا.

لەبارەی کەشوهەوای رۆژهەڵاتی کوردستانیش ئاماژه‌ به‌وه‌كراوه‌، لەچەندین شار مەترێک بۆ مەترو نیوێک بەفر باریوەو لەشارەکان بەگشتیی شه‌وى رابردوو بەفرێکی زۆر باریوه‌، لەباکوری کوردستانیش بەهۆی زۆری بەفربارین، ئاستەگی هاتووچۆ دروستبوەو چه‌ندین گوندو شارۆچكه‌ش رێگه‌ى هاتووچۆى نه‌ماوه‌.

PUKMEDIA