ڕفعەت عەبدوڵا: شەهیدان ناسنامەی یەکێتین

PUKMEDIA

ڕفعەت عەبدوڵا جێگری سەرۆکی یەکێتیی نیشتمانیی کوردستان

جێگری سەرۆکی یەکێتی پەیامێک بۆ رۆژی شەهیدی یەکێتی بڵاودەکاتەوەو تێیدا رایدەگەیەنێت: شەهیدان بوونەتە ناسنامەی یەکێتی و مێژوو شۆرەتی حزبی شەهیدانی پێبەخشیوە، ئەم تایتڵە دەلالەتە لەوەی بستێکی کوردستان نەماوە بەخوێنی سەرکردەو فەرماندەو پێشمەرگەیەکی یەکێتی ئاو نەدرابێت.

دەقی پەیامەکە..

لەتۆماری خەبات و مێژوی پڕ شانازی (ی.ن.ک) شەهیدان نەخشێکی گەورەیان هەیەو بوونەتە ئیلهامبەخشی هەموو نەوەکانی کۆڕی تێکۆشان، جگە لەوەش شەهیدان بوونەتە ناسنامەی یەکێتی و مێژوو شۆرەتی حزبی شەهیدانی پێبەخشیوە، ئەم تایتڵە دەلالەتە لەوەی بستێکی کوردستان نەماوە بەخوێنی سەرکردەو فەرماندەو پێشمەرگەیەکی یەکێتی ئاو نەدرابێت و ئەرکێکی گرنگیش دەخاتە ئەستۆمان، كەهەمیشە وەفاداری خوێنی شەهیدان و ئەو ئامانج و خەونانە بین كەشەهیدەکانمان خوێن و گیانیان خەڵاتی ئازادی و ڕزگاری کوردستان کرد.

(ی.ن.ک) روبارێک خوێنی بۆ ئازادی و دەسکەوتە بەدیهاتوەکانی کوردستان رشتووە، گرنگە ئەم یادە وەک بۆنەیەکی نیشتمانی مەزن لەڕۆژمێری گەلەکەماندا یادی بکرێتەوە.

لەڕۆژی شەهیدی یەکێتیدا، وەفاداری رێبازی (کەم بژی و کەڵ بژی)ین، کەسەرکردەکانی (ی.ن.ک) بوونە ناونیشانی خۆڕاگڕی و گیانبازی و ڕەمزی شەهادەت.

ئەم یادە مەزنە دەرفەتی جۆشدانەوەی خەباتە لەگەڵ کۆمەڵانی خەڵک و دوبارەکردنەوەی بەڵێنە بەشەهیدان 
کە لەپێناو مافی ڕەوای هاوڵاتیان و دادپەروەری و نەهێشتنی سیاسەتی جیاوازیکردن وتاکڕەوی، خەبات درێژەی هەیەو بەردەوامین و هەمیشەش خزمەتکاری کەسوکارو نەوەی سەربەرزی شەهیدانین.

سڵاو لەگیانی پاکی شەهیدانی یەکێتیی و شۆڕشی نوێ و تێکڕای شەهیدانی کوردستان

ڕفعەت عەبدوڵا
جێگری سەرۆکی یەکێتیی نیشتمانیی کوردستان

PUKMEDIA