بەرگری و فریاکەوتن: بۆ رۆژی شەهیدی یەکێتی دەست لەسەر سنگ دادەنێین

PUKMEDIA

رۆژی شەهیدی یەکێتی

فەرماندەیی پێشمەرگەی بەرگری وفریاکەوتن بۆ رۆژی شەهیدی یەکێتی پەیامیك بڵاودەکاتەوەو رایدەگەیەنێت: مێژوو گەواهیدەرە، دروشمی "کەم بژی  وکەڵ بژی"، رێباز وهزرو نەریت وپابەندی ئەو قارەمان وفیداکارانەی یەکێتی و شۆڕشی نوێی گەلەکەمان بوو.

پەیامی فەرماندەیی پێشمەرگەی بەرگری وفریاکەوتن بۆ ڕۆژی شەهیدی یەکێتی

لەساڵیاد وبیرەوەری رۆژی شەهیدی یەکێتیدا، سەری رێزو وەفا لەبەردەم گڵکۆی شەهیداندا دادەنوێنین و لەئاست گیان فیدایی و خۆنەویستی وبوێری و قوربانیدانیان بەشکۆوە دەست لەسەر سنگ، ئەم یادە بەرزوپیرۆز رادەگرین .  

مێژوو گەواهیدەرە، دروشمی "کەم بژی  وکەڵ بژی"، رێباز وهزرو نەریت وپابەندی ئەو قارەمان وفیداکارانەی یەکێتی و شۆڕشی نوێی گەلەکەمان بوو،  کە شەهیدان خاڵە شەهاب وهاوڕێکانی دایانهێنا  وبوونە سەرمەشقی ئەو کاروانە دوورو درێژەی هەزاران شەهیدی سەرکردەو تێکۆشەرانی رۆژانی سەختی بەرەنگاری وداستانی پڕ شکۆی نەبەردی وقارەمانانی زیندان و رێکخستنەکان و ئەنفال وکیمیاباران وبەرهەڵستکارانی ستەم ونادادی و دڕەندەیی رژێمی رەفتار فاشتی بەعس وشەهیدانی دەستی تیرۆر، کە لە پێناو رزگاری و سەربەستی و ئازادی گەلەکەماندا ، بێ باکانە لە وێستگەکانی تێکۆشاندا لاپەڕەی پڕ شانازی وسەروەریان تۆمارکرد .  

بەڵگە نەویستە، ئەو دەستکەوتانەی ئەمڕۆ بەدەستهاتووەو لە داهاتووشدا دێتەدی، بەرهەمی خوێنی گەشی شەهیدانمانە، ئەگەرچی ئەوان کەم ژیان، بەڵام شاکاری دەستەبەرکردنی ئازادییان نەخشاند وبوونە مەشخەڵی جۆشدانی خەباتی رزگاربوون لە ژێر دەستەیی و ستەم ونادادی وبەدیهێنانی مافە نەتەوەیی ونیشتیمانیەکان وئەزموونی حکومڕانی وخۆشگوزەرانی هاووڵاتیان .   
  
لە  یاد وبیرەوەری رۆژی شەهیدی یەکێتی و گیانبازانی نیشتیماندا، کە گەورەترین سەرمایەی ژیانیان بەخشی بە خاک وگەلەکەمان، بەیەقینەوە بەڵێن دەدەین، تا گەیشتن بە ئاوات و ئامانجەکانیان لەسەر رێبازەکەیان بەردەوام بین وپارێزگاری لە دەستکەوتەکان بکەین، چونکە شەهیدان تیشکی رووناکی رێگەو سەرچاوەی هێزو وورەو باوەڕمانن .    
بەرزو پیرۆزبێت رۆژی شەهیدانی یەکێتی ودروودوسڵاو بۆ رۆحی پاکیان .

فەرماندەیی پێشمەرگەی بەرگری وفریاکەوتن
21ی تشرینی دووەمی 2025

PUKMEDIA