دامەزراوەی ڤیم لەزانكۆی كۆیە دیدارێكی زانستی بەڕێوەدەبات

دامەزراوەی ڤیم

دیداری زانستی كۆیە شاری مەعریفەت و شارستانییەت لەنێوان دوێنێ و ئەمڕۆدا

دامەزراوەی ڤیم بە هاوبەشی ئینستیوتی زەینەب خان و زانكۆی كۆیە، دیدارێكی زانستی لەژێر ناونیشانی (كۆیە شاری مەعریفەت و شارستانییەت لەنێوان دوێنێ و ئەمڕۆدا) بەڕێوەدەبات، وتەبێژی دیدارەكەش رایدەگەیەنێت: ئامانج لە دیدارەكە خزمەتكردنی شاری كۆیە و ناساندنی پاشخانە كلتورییە دەوڵەمەندەكەیەتی.

شادمان محەمەد، وتەبێژی دیداری زانستی كۆیە، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: گرنگیدان بە شار و شارۆچكەكانی كوردستان بە بێ جیاوازی لە كارە بنەڕەتییەكانی دامەزراوەی ڤیم-ە، بۆ ئەو مەبەستەش ئەمڕۆ 20ی 11ی 2025، دامەزراوەی ڤیم بە هاوبەشی ئینستیوتی زەینەب خان و زانكۆی كۆیە، لە هۆڵی سەرۆكایەتی زانكۆكە دیداری زانستی كۆیە لەژێر ناونیشانی (كۆیە شاری مەعریفەت و شارستانییەت لەنێوان دوێنێ و ئەمڕۆدا) بەڕێوەدەبات.

راشیگەیاند: ئامانج لەم دیدارە زانستییە، خزمەتكردنە بە شاری كۆیە و شەش توێژەری پسپۆڕ بە بابەتی جیاواز گفتوگۆ لەسەر ئەو پاشخانە كلتورییە دەوڵەمەندە دەكەن كە شارەكەی پێناسراوە، بۆ ئەوەی بەراوردرێك لەنێوان ئەمڕۆ و رابردووی شارەكەدا بكرێت و لەسەر ئەو بنەمایە بزانرێت پێویستە ئێستا چی بۆ كۆیە بكرێت.

شادمان محەمەد ئەوەشی خستەڕوو: دامەزراوەی ڤیم پلان و بەرنامەی باشتری بۆ شاری كۆیە و برەودان بە لایەنی كلتوری و رۆشنیرییەكەی هەیە، چونكە كۆیە بە لانكەی كلتور و رۆشنبیری كوردستان دادەنرێت و شوێنی پێگەیاندنی دەیان كەسایەتی مەزنە كە كورد شانازیان پێوەدەكات.

ڤیم دامەزراوەیەكی قازانجنەویستی ناحكومییە و گرنگی بە بوارە جیاوازەكانی كۆمەڵگە دەدات، لەكێشەكان ورد دەبێتەوە و هەوڵی چارەسەركردنیان دەدات.

PUKMEDIA