کۆمسیۆن: یەکێتی لە پێنج پارێزگای عیراق کاندیدی سەرکەوتووی هەیە

PUKMEDIA

یەکێتیی نیشتمانیی کوردستان

كۆمسیۆنی باڵای سه‌ربه‌خۆی هه‌ڵبژاردنه‌كانی عیراق، ئه‌نجامی كۆتایی هه‌ڵبژاردنی خولی شه‌شه‌می ئه‌نجومه‌نی نوێنه‌رانی عیراقی راگه‌یاند و به‌پێی ئه‌نجامه‌كانیش، یه‌كێتیی نیشتمانیی كوردستان له‌ پێنج  پارێزگای عیراق ده‌نگی هێناوه‌ و كاندیدی سه‌ركه‌وتووی هه‌یه‌.

به‌پێی ئه‌نجامه‌ به‌راییه‌كانی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق، له‌هه‌ڵبژاردنی خولی شه‌شه‌می ئه‌نجومه‌نی نوێنه‌رانی عیراقدا، یه‌كێتیی نیشتمانیی كوردستان كه‌ به‌ لیستی سه‌ربه‌خۆی ژماره‌ 222 به‌شداری هه‌ڵبژاردنه‌كه‌ی كردووه‌، له‌ بازنه‌ی سلێمانی 241 هەزار و 143 ده‌نگی به‌ده‌ستهێناوه‌، هه‌روه‌ها له‌ بازنه‌ی هه‌ولێریش97 هه‌زار و 411 ده‌نگی به‌ده‌ستهێناوه‌.

هاوكات له‌ بازنه‌ی كه‌ركوك، یه‌كێتیی نیشتمانیی كوردستان كه‌ به‌ لیستی سه‌ربه‌خۆی ژماره‌ 222 به‌شداری هه‌ڵبژاردنه‌كه‌ی كردووه‌، 178 هه‌زار و 845 ده‌نگی به‌ده‌ستهێناوه‌، له‌ بازنه‌ی نه‌ینه‌واش كه‌ له‌ چوارچێوه‌ی هاوپه‌یمانێتی یه‌كێتی خه‌ڵكی نه‌ینه‌وا به‌ ژماره‌ 281 به‌شداری هه‌ڵبژاردنه‌كه‌ی كرد و 56 هەزار و 420 ده‌نگی به‌ده‌ستهێناوه‌ و بازنه‌ی به‌غدادیش یه‌كێتیی نیشتمانیی كوردستان كه‌ یه‌ك كاندیدی له‌نێو لیستی ئاوه‌دانكردنه‌وه‌ و گه‌شه‌پێداندا هه‌بوو، چوار هەزار و 708  دەنگی بەدەستهێنا و سه‌ركه‌وت.



یه‌كێتیی نیشتمانیی كوردستان بۆ هه‌ڵبژاردنی ئه‌نجومه‌نی نوێنه‌رانی عیراق، به‌ زیاتر له‌ 150 كاندید له‌ هه‌شت پارێزگای عیراق به‌شداری كردو له‌پارێزگای نه‌ینه‌وا-ش له‌چوارچێوه‌ی یه‌كێتی خه‌ڵكی نه‌ینه‌وا-دا به‌ ژماره‌ 281 به‌شداربوو كه‌  31 كاندیدی هه‌بوو.

رۆژی 9ی 11ی 2025، هه‌ڵبژاردنی تایبه‌ت بۆ خولی شه‌شه‌می ئه‌نجومه‌نی نوێنه‌رانی عیراق به‌ڕ‌ێوه‌چوو، به‌پێی داتاكانی كۆمسیۆنی باڵای سه‌ربه‌خۆی هه‌ڵبژاردنه‌كان له‌ هه‌موو پارێزگاكانی عیراق ملیۆنێك و 313 هه‌زار و 980 ئه‌ندامی هێزه‌ ئه‌منییه‌كان مافی به‌شداریكردنیان له‌ ده‌نگدانی تایبه‌تدا هه‌بوو، له‌و ژماره‌یه‌ش نزیكه‌ی 270 هه‌زار ده‌نگده‌ر له‌ هه‌رێم بوون، كه‌ 809 بنكه‌یان بۆ ئاماده‌كرابوو، له‌ 4 هه‌زار و 501 وێستگه‌دا ده‌نگیاندا، هه‌روه‌ها 26 هه‌زار و 538 ئاواره‌ی ناوخۆ-ش مافی ده‌نگدانیان هه‌بوو كه‌ 97 وێستگه‌یان له‌ 27 بنكه‌دا بۆ ئاماده‌كرابوو.

سه‌عات 7:00ی سه‌رله‌به‌یانی رۆژی 11ی11ی2025، هه‌شت هه‌زار و 703 بنكه‌ی ده‌نگدان كه‌ له‌ 39 هه‌زار و 285 وێستگه‌ پێكدێن به‌ڕ‌‌وی ده‌نگده‌رانی عیراق و هه‌رێمی كوردستاندا كرانه‌وه‌، كه‌ ده‌نگده‌ران له‌ كۆی حه‌وت هه‌زار و 700 كاندید 329 كاندید ده‌كه‌نه‌ ئه‌ندامی ئه‌نجومه‌نی نوێنه‌رانی عیراق.



PUKMEDIA