لە عیراق زیاتر لە 700 خێزان بەهۆی بە بیابانبوونەوە ئاوارەبوون

میدیا عیراقییەکان

دیاردەی بە بیابانبوون لە عیراق

بەهۆی گۆڕانی کەشوهەوا و بەبیابانبوونەوە 742 خێزان لە سێ پارێزگای عیراق ئاوارەی شاری نەجەف بوون، بەڕێوەبەری کۆچ و کۆچبەرانی پارێزگاکەش رایدەگەیەنێت:" زۆرینەی ئەو خێزانانە لەگەڵ کشتوکاڵکردن خەریک بوون و بەهۆی گۆڕانی کەشوهەواوە زەوییەکانیان لەدەستداوە".

 رەعد توفەیلی بەرێوەبەری گشتی کۆچ و کۆچبەرانی نەجەف، بە رۆژنامەی سەباحی راگەیاند: 742 خێزان لە پارێزگاکانی دیوانیە و موسەنا و زیقار ئاوارەی پارێزگای نەجەف بوون، کە زۆرینەیان لە دیوانییەوە هاتوون.

راشیگەیاند: ئاوارەکان هاریکاری تەندروستی و خۆراکیان پێدراوە و بەردەوام بوونی هاوکارییەکانیش بەندە بە بەردەوامبوونی ئەو پشکەی مادییەی بۆ ئەو لایەنە تەرخانکراوە.

راشیگەیاند: زۆرینەی ئەو خێزانانە بەکشتوکاڵەوە خەریک بوون، بەڵام بەهۆی وشکەساڵی و گۆڕانی کەشوهەواوە، زەوییەکانیان رووبەڕووی بە بیابانبوون بووەتەوە.
هاوکات، عیراق رووبەڕووی کەمئاویش بووەتەوە ئاستی ئاوی كۆگاكراو بۆ كەمتر لە هەشت ملیار مەتر سێجا دابەزیووە، لەو بارەیەوە غەزوان سەهلان یاریدەدەری بەڕێوەبەری گشتی دەستەی خستنەگەڕی پرۆژەكانی ئاودێری لە وەزارەتی سەرچاوە ئاوییەكانی عیراق رایگەیاند: ئاستی ئاوی كۆگاكراو لە عیراقدا بەردەوامە لە دابەزین و گەیشتووەتە كەمتر لە هەشت ملیار مەتر سێجا.

وتیشی: پێشبینی دەكرێت ئەو بڕە ئاوەی كۆگاكراوە تا وەرزی زستانی داهاتوو بەشی پێداویستییەكانی بكات، ئەویش تەنها بۆ خواردنەوە و باخداریی نەك بۆ كشتوكاڵكردن.

ئاماژەی بەوەشکرد: ئاستی بەردانەوەی ئاو لەلایەن توركیاوە بۆ عیراق لە رێگەی روباری فوراتەوە دەگاتە 200 مەتر سێجا لە چركەیەكدا و ئەوەش كەمە و لە ئاست پێداویستییەكانی عیراقدا نییە، بەو هۆیەشەوە رۆژانە 850 بۆ 900 مەتر سێجا لە ئاوی كۆگراوی بەنداوەكانی حەدیسە و موسڵ و دوكان و دەربەندیخان و دەریاچەی سەرسار بۆ پێداویستی دەردەهێنرێت.

PUKMEDIA