سه‌رخۆشییه‌ك بۆ كه‌سوكاری پاڵه‌وانی له‌شجوانیی عیراق و قوربانیانی دیکە

PUKMEDIA

مەکتەبی راگەیاندن و هۆشیاری

مه‌كته‌بی راگه‌یاندن و هۆشیاریی یەکێتیی نیشتمانیی کوردستان لە پەیامێکیدا سەرەخۆشی لە کەسوکاری قوربانیانی رووداوەکەی دوێنێ دەکات و داواش دەکات:" روماڵكردنی میدیایی رووداوه‌كه‌ به‌ دووربێت له‌ جوڵاندنی گیانی دووبه‌ره‌كی و ره‌گه‌زپه‌رستی".

دەقی راگەیەندراوەکەی مه‌كته‌بی راگه‌یاندن و هۆشیاریی:

سه‌رخۆشییه‌ك بۆ كه‌سوكاری پاڵه‌وانی له‌شجوانیی عیراق و قوربانیانی تر
  به‌داخه‌وه‌، دوێنێ له‌سه‌ر رێگه‌ی كه‌سنه‌زان له‌ شاری هه‌ولێر له‌كاتی ده‌مه‌قاڵێی نێوان كرێكاری به‌نزینخانه‌یه‌ك كه‌ په‌نای بۆ چه‌ك بردووه‌ له‌گه‌ڵ سێ هاوڵاتی تر كه‌ دووانیان عه‌ره‌ب بوون و بۆ به‌نزینكردن روویانكردۆته‌ به‌نزینخانه‌كه‌، له‌ رووداوێكی دڵته‌زێن و ئازاربه‌خشدا، سێ كه‌س ده‌بنه‌ قوربانی و گیان له‌ده‌ستده‌ده‌ن، كه‌ یه‌كێكیان پاڵه‌وانی له‌شجوانیی عیراق (حه‌مودی رياز)ه‌.

  له‌كاتێكدا سه‌رخۆشی له‌كه‌سوكاری حه‌مودی رياز و "یه‌كێتیی نيشتمانيی عيراق بۆ له‌شجوانی و ته‌وژمی جه‌سته‌یی" و كه‌سوكاری قوربانیانی تر ده‌كه‌ین، هیوادارین كه‌ روماڵكردنی میدیایی رووداوه‌كه‌ به‌ دووربێت له‌ جوڵاندنی گیانی دووبه‌ره‌كی و ره‌گه‌زپه‌رستی، به‌ تایبه‌تی كه‌ هه‌موو پێكهاته‌كانی عیراق له‌ هه‌ولێری پایته‌خت و هه‌موو شاره‌كانی تری هه‌رێمیی كوردستان، به‌ ئازادی و گیانی‌ برایه‌تی و خۆشه‌ویستی و دوور له‌ فیتنه‌و دووبه‌ره‌كی ده‌ژین.. خوا سه‌بوریی دڵی خانه‌واده‌ی قوربانیان بدات و دوا كۆستیان بێت و قوربانيانيش بخاته‌ به‌ر ره‌حمه‌تی فراوانی خۆی.

 مه‌كته‌بی راگه‌یاندن و هۆشیاریی (ی.ن.ك)

PUKMEDIA