نرخی نەوت دابەزی

میدیاکان

دابەزینی نرخی نەوت

ئەمرۆ 1ی7ی2025، لەگەڵ کردنەوەی بازاڕەکان نرخی نەوت دابەزی و یەک بەرمیل نەوتی برێنت بە 66 دۆلار و 57 سەنت مامەڵەی پێوە کرا، هۆکارەکەشی بۆ زیادکردنی بڕی هەناردەی نەوت دەگەڕێتەوە.

بەهۆی زیادکردنی بڕی هەناردەی نەوت لەلایەن رێکخراوی ئۆپیک پڵەسەوە، نرخی نەوت دابەزینی بەخۆیەوە بینی و بەشێوەیەک لەگەڵ کردنەوەی بازاڕ، یەک بەرمیل نەوتی برێنت 0.3% دابەزی و بە 66 دۆلار و 57 سەنت مامەڵەی پێوەکرا.

هاوکات یەک بەرمیل نەوتی خاوی تەکساس بەرێژەی 0.3% دابەزی و بە 63 دۆلار و 64 سەنت مامەڵەی پێوەکرا، بەمەش لە ماوەی سێ هەفتەی رابردوودا بۆ نزمترین ئاستی خۆی دابەزی.

ئاژانسی رۆیتەرز بڵاویکردەوە، رێکخراوی ئۆپیک پڵەس لە سەرەتای مانگی ئابەوە بڕی 411 هەزار بەرمیلی رۆژانە زیاد دەکات، بەمەش بەرهەمی ئۆپیک دەگاتە 1.78 ملیۆن بەرمیلی رۆژانە، هەرچەندە ئەو زیادکردنە هێشتا نەگەیشتووەتەوە ئەو بڕەی کە لە ماوەی دوو ساڵی رابردوودا کەمیکردۆتەوە، بەڵام کاریگەری لەسەر نرخی نەوت داناوە.

PUKMEDIA