سەرۆکی ئەمریکا سزاکانی سەر سوریا هەڵدەگرێت

رۆیتەرز

دۆناڵد ترەمپ سەرۆکی ئەمریکا

دۆناڵد ترەمپ سەرۆکی ئەمریکا، فەرمانێکی جێبەجێکاری بۆ لابردنی سزاکانی سەر سوریا دەرکرد و دووپاتیشی کردەوە:" پشتیوانی لە سوریایەکی سەقامگیر و یەکگرتوو" دەکات.

فەرمانەکە هەڵگرتنی زۆرینەى سزاکانی سەر سوریا دەگرێتەوە، جگە لە هێشتنەوەی سزاکانی سەر بەشار ئەسەد و هاوکارەکانی، پێشێلکارانی مافی مرۆڤ، بازرگانانی ماددە هۆشبەرەکان، کەسانی پەیوەندیدار بە چالاکییەکانی چەکی کیمیایی، داعش و لقەکانی و گرووپە چەکدارەکان.

بەپێی دەقی فەرمانەکە کەوەزارەتی گەنجینەی ئەمریکا بڵاویکردووەتەوە:" واشنتن پابەند دەبێت بە پشتیوانی لە سوریایەکی سەقامگیر و یەکگرتوو، کە نەبێتە پەناگەیەکی ئارام بۆ رێکخراوە تیرۆریستییەکان، ئاسایشی پێکهاتە ئایینی و نەتەوەییەکانی وڵاتەکە بپارێزێت و پاڵپشتی لە ئاسایش و خۆشگوزەرانی ناوچەکە بکات".

لای خۆشییەوە، دۆناڵد ترەمپ رایگەیاند:" حکومەتی نوێی سوریا بەسەرۆکایەتیی ئەحمەد شەرع رێوشوێنی ئەرێنی گرتووەتەبەر و وەزیرانی دەرەوە و گەنجینەی ئەمریکا لە مانگی رابردووەوە هەنگاوی سەرەتاییان ناوە بۆ هەڵگرتنی سزاکانی سەر سوریا".
راشیگەیاند "بارودۆخی سوریا بەهۆی پێشهاتەکانی شەش مانگی رابردووەوە گۆڕانکارییان بەسەردا هاتووە".

هاوکات، ئەسعەد شەیبانی وەزیری دەرەوەی سوریا  ستایشی فەرمانەکەی کرد و رایگەیاند:" هەڵگرتنی سزاکان بەربەستی بەردەم بووژانەوەی ئابوری لادەبات، یارمەتیدەرە دەبێت بۆ کرانەوەیان بەڕووی کۆمەڵگەی نێودەوڵەتیدا و دەرگا بەڕووی پرۆسەی ئاوەدانکردنەوە و گەشەپێدانی وڵاتەکەدا دەکاتەوە".

PUKMEDIA