لایه‌نه‌ كوردستانییه‌كان پشتیوانی دانیشتوانی گه‌ڕه‌كی نه‌ورۆز له‌كه‌ركوك ده‌كه‌ن

PUKMEDIA

رەوەند مەلا مەحمود لێپرسراوی مەڵبەندی کەرکوک

حزب و لایەنە کوردستانییەکانی شاری کەرکوک بۆ پشتگیریکردنی دانیشتوانی گەڕەکی نەورۆز بەیاننامەیەکیان بڵاوکردەوە و رایانگەیاند:" پێویستە لایەنە براوەکانی شاری کەرکوک پەلە بکەن لەپێکهێنانی ئەنجومەنی پارێزگای شارەکە، تا کۆتایی بەم دۆخە بهێنرێت".

رەوەند مەلا مەحمود لێپرسراوی مەڵبەندی کەرکوک بەناوی سەرجەم حزبە کوردستانییەکانەوە لە بەیاننامەکەدا رایگەیاند:" داواکرین بەزووترین کات ئەو هیزەی سوپا کە گەمارۆی گەڕەکی کوردنشینی نەورۆزی داوە بکشێتەوەو کۆتایی بە ترس و تۆقاندن لەگەڕەکەدا بهێنێت، داواش لە نوێنەرانی کورد دەکەین لەبەغدا بە جددی کار بۆ ئەم مەبەستە بکەن و لەڕێگەی لایەنە پەیوەندیدارەکانەوە سنورێک بۆ پێشێلکارییەکانی سوپا لەشاری کەرکوک دابنێن ".

راشیگەیاند:" پێویستە لایەنە براوەکانی شاری کەرکوک پەلە بکەن لەپێکهێنانی ئەنجومەنی پارێزگای شارەکە، تا کۆتایی بەم دۆخە بهێنرێت و ئێمەش وەک حزب و لایەنە کوردستانییەکان خەڵکی خۆڕاگری کەرکوک دڵنیادەکەینەوە لەگەڵیان دەبین و هەرگیز بەجێیان ناهێڵین".

رۆژی 2-1-2024 لەلایەن قائیمقامی کەرکوکەوە هێزێکی سوپای عیراق گەیشتنە گەڕەکی نەورۆزی شاری کەرکوک و داوایان لە دانیشتوانی گەڕەکەکە کرد، کە خانووەکانیان چۆڵ بکەن و بیدەن بە ئەفسەرانی سوپای عیراق، بۆ ئەمەش 14حزب و لایەنی کوردستانیی بۆ پشتگیریکردنی دانیشتوانی گەڕەکی نەورۆز بەیاننامەیەکیان بڵاوکردەوە و دڵنیاییان دایە دانیشتوانی گەڕەکەکە کە لەگەڵیان دەبن و بەجێیان ناهێڵن.

PUKMEDIA