قوباد تاڵەبانی: یەكەم و کۆتا بژاردەی هەرێم و عیراق رێككەوتنێكی گشتگیر و درێژخایەنە

PUKMEDIA

قوباد تاڵەبانی و محمد شیاع سودانی

قوباد تاڵەبانی جێگری سەرۆكی حكومەتی هەرێمی كوردستان لە بارەی ئەو زنجیرە كۆبوونەوانەی لە سەردانەكەیدا بۆ بەغدا لەگەڵ ژمارەیەك كەسایەتی باڵای حكومی و حزبی عیراق ئەنجامیداون، لە پەڕەی خۆی لە تۆڕی كۆمەڵایەتی فەیس بووك پەیامێكی بڵاوكردۆتەوە و رایگەیاندووە: یەكەم بژاردە و كۆتا بژاردەی بەردەم هەردوو حكومەت رێككەوتنێكی گشتگیر و درێژخایەنە و  چیتر دواكەوتنی رێككەوتن لەبەرژەوەندی هیچ لایەكدا نییە. 

دەقی پەیامەكەی قوباد تاڵەبانی:

یەكەم بژاردە و كۆتا بژاردەی بەردەم هەردوو حكومەتی هەرێم و حكومەتی فیدراڵ رێككەوتنێكی گشتگیر و درێژخایەنە كە بەپێی دەستور و لە بەرژەوەندی هەموو هاوڵاتیانی عێراق و كوردستاندا بێت. 

لە كۆبوونەوەكانم لە بەغدا لەگەڵ هەر یەكە لە بەڕێز دكتۆر لەتیف رەشید سەرۆك كۆماری عێراق، بەڕێز محەمەد شیاع سودانی سەرۆك وەزیران، بەڕێز محەمەد حەلبوسی سەرۆكی ئەنجومەنی نوێنەرانی عێراق، بەڕێز عەمار حەكیم سەرۆكی رەوتی حیكمە و بەڕێز ئەحمەد ئەسەدی وەزیری كار و كاروباری كۆمەڵایەتیی عێراق جەختمان كردەوە دەبێت گفتوگۆكانمان چڕبكەینەوە بۆ ئەوەی لەماوەیەكی نزیكدا بە تایبەت لەسەر هەردوو پرسی بودجە و یاسای نەوت و گاز رێك بكەوین. چیتر دواكەوتنی رێككەوتن لەبەرژەوەندی هیچ لایەكدا نییە. 

هەموو خەڵكی عیراق بە هەرێمی كوردستانیشەوە داوای خزمەتگوزاریی و خۆشگوزەرانیی دەكەن. رێككەوتنی نێوان هەرێم و بەغدا زەمینەیەكی لەبار دروست دەكات تا هەردوولا پێكەوە كاربكەین بۆ جێبەجێكردنی داواكارییەكانی خەڵك و باشتركردنی دۆخی خزمەتگوزارییەكان

هیوادارین پەیوەندییەكانی نێوان هەرێم و بەغدا بگەنە ئاستێكی زۆر باش و گەشبینم لەگەڵ ئەم كابینەیەی حكومەتی عێراق بە سەرۆكایەتی بەڕێز محەمەد شیاع سودانی بەشێكی زۆری كێشەكان چارەسەر بكەین.

PUKMEDIA