قوباد تاڵەبانی و برێت مەکگۆرک : هەرێم و بەغدا رێککەوتنی گشتگیر بکەن

قوباد تاڵەبانی و برێت مەکگۆرک : هەرێم و بەغدا رێککەوتنی گشتگیر بکەن

قوباد تاڵەبانی جێگری سەرۆک وەزیران لە کۆبوونەوەی لەگەڵ برێت مەکگۆرک رێکخەری کۆشکی سپی بۆ کاروباری ئاسایشی رۆژهەڵاتی ناوەڕاست و باکوری ئەفریقا دۆخی هەرێمی کوردستان و چۆنییەتی چارەسەرکردنی ناکۆکییەکانی نێوان لایەنە سیاسییەکانیان تاوتوێ کرد.

لە کۆبوونەوەکەدا کە رۆژی سێ شەمە ١٧ی کانوونی دووەمی ٢٠٢٣ لە هەولێر بەڕێوەچوو و تیایدا هەر یەکە لە ئامۆس هۆكشتین، رێكخەری تایبەتی سەرۆكایەتیی بۆ ژێرخانی جیهانی و ئاسایشی وزە و ئالینا رۆمانۆسكی باڵیۆزی ئەمریكا لە عێراق و ژمارەیەك راوێژكاری وەزارەتی دەرەوەی ئەمریكا یاوەری برێت مەکگۆرکیان دەکرد، کێشە ناوخۆییەکان و پەیوەندییەکانی نێوان هەرێم و بەغدا و پێگەی هەرێمی کوردستان لە ناوچەکەدا تاوتوێ کرا.

لە تەوەرێکی کۆبوونەوەکەدا وەفدی ئەمریکا پشتگیری خۆیان بۆ هەرێمی کوردستان دووپات کردەوە و جەختیان کردەوە لەسەر بەردەوامیدان بە هاوکاریکردنی هێزەکانی پێشمەرگە و چاکسازی لە وەزارتی پێشمەرگەدا. هیوای ئەوەشیان خواست کە  لایەنە سیاسییەکانی هەرێمی کوردستان لەڕێی گفتوگۆ و دانووستانەوە چارەسەری کێشە ناوخۆییەکان بکەن.

هەر لە کۆبوونەوەکەدا باسی وزە و سیاسەتی نەوت و گازی هەرێمی کوردستان کرا. لەمبارەیەشەوە جێگری سەرۆک وەزیران رایگەیاند؛  دەبێت هەرێمی کوردستان و حکومەتی فیدرال پەلە بکەن لە رێککەوتن لەسەر یاسای نەوت و گاز بۆ ئەوەی کۆتایی بەو ناکۆکییانە بهێنرێت کە چەندین ساڵە هەیە.

سەبارەت بە پەیوەندییەکانی نێوان هەرێمی کوردستان و حکومەتی فیدراڵیش، جێگری سەرۆک وەزیران رایگەیاند؛ لەم قۆناغەدا پەیوەندییەکان لە ئاستێکی باشدان و پێویستە ئەم دەرفەتە بەکاربهێنین تا رێککەوتنێکی گشتگیر و درێژخایەن لەسەر بودجە و یاسای نەوت و گاز و هەموو ئاستەکانی دیکەدا بکرێت کە لە بەرژەوەندی هەموو هاوڵاتیانی عێراق و هەرێمی کوردستان بێت.

لەمبارەیەوە وەفدی ئەمریکا پشتگیری خۆیان بۆ بەهێزکردنی ئەو پەیوەندییانە دەربڕی و ئامادەییان نیشاندا هاوکاری هەر دوو حکومەت بکەن بۆ ئەوەی بە رێککەوتنێکی گشتگیر بگەن کە لە خزمەتی هاوڵاتیانی کوردستان و عێراق و پاراستنی ئاسایش و سەقامگیری ناوچەکەدا بێت.
لە کۆبوونەوەکەدا دابان شەدەڵە جێگری بەرپرسی فەرمانگەی پەیوەندییەکانی دەرەوەی حکومەتی هەرێمی کوردستان بەشدار بوو.

PUKMEDIA