ئێران.. بەھۆی لافاوەوە چوار كەسی دیكە گیانیانلەدەستدا

شەوی رابردوو لە ناوچەكانی دەوروبەری تاران بەهۆی بارانی زۆرەوە لافاو دروست بوو، چەندین كەس ماڵەكانیان جێهێشت، تا ئێستاش چوار كەس بەهۆی لافاوەكەوە گیانیانلەدەستداوە و نۆ كەسی دیكەش بریندار بوون و چەند هاووڵاتییەكیش بێسەرو شوێنن.

لەوبارەیەوە میدیاكانی ئێران رایانگەیاند: سەعات 1:30 دەقیقەی بەیانی ئەمڕۆ 28-7-2022، لافاوێك لە ناوچەی ئیمام زادە داود لە تاران روویدا و بەهۆیەوە چوار كەس گیانیانلەدەستدا و نۆ كەسی دیكەش بریندار بوون، هاوكات ژمارەیەك هاووڵاتیش بێسەروشوێنن.

ئەوەشیان راگەیاند: تا ئێستا 500 كەس بۆ ناوچە ئارامەكان گواستراونەتەوە، سەرۆكی كۆمەڵەی مانگی سووریش رایگەیاند: تیمەكانی ئۆپەراسیۆنی مانگی سوور و  كۆپتەرەكانی ئامادەن بۆ گەڕان بەدوای قوربانییەكان و 10 تیمی سەگی گەڕان بەدوای بێسەروشوێن بووەكاندا دەگەڕێن.

هاوكات ئیبراھیم رەئیسی سەرۆك كۆماری ئێران داوای لە پارێزگاری تاران كردووە ھەوڵەكانی بخاتەگەڕ بۆ بەھاناوەچوونی لێقەوماوان.

PUKmedia ئاژانسەكان