قوباد تاڵه‌بانی: شینزۆ ئابێ سه‌ركرده‌یه‌كی ده‌ستپاك و خۆشه‌ویست و دڵسۆز بوو

قوباد تاڵه‌بانی جێگری سه‌رۆكی ئه‌نجومه‌نی وه‌زیران بۆ تیرۆركردنی سه‌رۆك وه‌زیرانی پێشووی ژاپۆن په‌یامێك بڵاوده‌كاته‌وه‌و ئاماژه‌ بۆ ئه‌وه‌ده‌كات، له‌م كاته‌ دژواره‌دا له‌گه‌ڵ خێزانه‌كه‌ی و حكومه‌ت و گه‌لی ژاپۆن ده‌بین و نیگه‌رانیی خۆمان به‌گیانله‌ده‌ستدانی ئه‌م سه‌ركرده‌ مه‌زنه‌ی ژاپۆن ده‌رده‌بڕین.

ده‌قی په‌یامه‌كه‌...
به‌داخین بۆ تێرۆركردنی شینزۆ ئابێ، سه‌رۆك وه‌زیرانی پێشووی ژاپۆن. ئه‌م رووداوه‌ له‌دڵه‌وه‌ نیگه‌ران و خه‌مباری كردین.

به‌ڕێز ئابێ نمونه‌ی سه‌ركرده‌ی ده‌ستپاك، خۆشه‌ویست، خه‌مخۆر و دڵسۆز بوو؛ كه‌سایه‌تیه‌كی مێژوویی بوو كه‌ ژاپۆن له‌سایه‌یدا چه‌ندین كاره‌سات و قه‌یرانی تێپه‌ڕاندوه‌ و هه‌موو ژیانی خۆی بۆ خزمه‌تكردنی میلله‌ته‌كه‌ی ته‌رخان كردبوو. 

كۆچكردوو چه‌ندین جار چاوی به‌ سه‌رۆك مام جه‌لال كه‌وتووه‌ و پێكه‌وه‌ به‌گرنگیه‌وه‌ باسیان له‌ دۆخی هه‌رێمی كوردستان و عێراق و خۆرهه‌ڵاتی ناوه‌ڕاست و چۆنییه‌تی ده‌رباز بوون له‌ گرفته‌كان كردووه‌، به‌نده‌ش له‌ساڵی ٢٠٠٢ ئه‌و شه‌ره‌فه‌م پێ بڕا كه‌ له‌ نزیكه‌وه‌ چاوم پێی بكه‌وێت.

له‌م كاته‌ دژواره‌دا له‌گه‌ڵ خێزانه‌كه‌ی و حكومه‌ت و گه‌لی ژاپۆن ده‌بین و نیگه‌رانیی خۆمان به‌گیانله‌ده‌ستدانی ئه‌م سه‌ركرده‌ مه‌زنه‌ی ژاپۆن ده‌رده‌بڕین كه‌ رۆڵێكی گرنگیی له‌ پێشخستنی وڵاته‌كه‌یدا بینی و به‌كۆچكردنیشی جێگه‌ی له‌ناو شانۆی سیاسیی جیهاندا دیارده‌بێت.

قوباد تاڵه‌بانی 
جێگری سه‌رۆكی ئه‌نجومه‌نی وه‌زیران

PUKmedia تایبه‌ت