وەزیری خوێندنی باڵا لەبارەی كەیسی دوو مامۆستا كوژراوەكەی زانكۆ روونكردنەوە دەدات

وەزیری خوێندنی باڵاو توێژینەوەی زانستی دڵنیایی دەدات، بەغەدر شەهیدكردنی مامۆستایانی زانكۆی سەڵاحەدین، هەرگیز كاریگەری نابێت لەسەر هەوڵەكانمان بۆ بەرزكردنەوەی كواڵتی و ریفۆڕم و چاكسازی لە سێكتەری خوێندنی باڵاو پێشخستنی ئاستی زانستی و مەعریفی  لە زانكۆكانی كوردستان.
ئەم لێدوانەی د.ئارام محەمەد قادر وەزیری خوێندنی باڵاو توێژینەوەی زانستی، ئەمڕۆ 4-7-2022  لەمیانی سەرپەشتی كردنی كۆبونەوەی نائاسایی ئەنجومەنی زانكۆی سەڵاحەدین هات، دەربارەی كەیسی مامۆستایانی بەغەدر شەهیدكراو (د. كاوان ئیسماعیل) راگری كۆلێژی یاسا و (د.ئیدریس حەمە خان) مامۆستا لە كۆلێژی ئەندازیاری زانكۆی سەڵاحەدین– هەولێر.
لە دەستپێكدا ئامادەبوان بۆ گیانی پاكی مامۆستایانی شەهید چەند ساتێك بەبێ دەنگی وەستان و پرسەو ماتەمیان بۆ گیانی پاكی مامۆستایانی شەهیدكراو دوپاتكردەوە، دواتر د. كامەران یونس، سەرۆكی زانكۆی سەڵاحەدین – هەولێر، لە وتەیەكدا ئاماژەی بەدواین پەرەسەندنەكانی كەیسی بەغەدر شەهیدكردنی مامۆستایانی زانكۆ كردو رایگەیاند: ئەم تاوانە هەرگیز ساردمان ناكاتەوە لە خزمەتكردن بە زانست و پێشخستنی ئاستی زانكۆ لەسەرجەم بوارەكاندا.
لە وتەیەكدا وەزیری خوێندنی باڵاو توێژینەوەی زانستی جارێكی تر پرسەو سەرەخۆشی ئاڕاستەی كەسوكارو بنەماڵەو سەرجەم مامۆستایان و خوێندكارانی هەردوو مامۆستای شەهید كردو رایگەیاند: مامۆستایانی بەغەدر شەهیدكراو دوو مامۆستای زانست پەروەر و دڵسۆز بەخاك و خەڵكی كوردستان بون كە هەموو تەمەنیان بۆ خزمەتی زانكۆ و پێشخستنی ئاستی زانستی كوردستانەكەیان تەرخانكردبو. بۆیە جارێكی تر لە بەردەم ئەندامانی ئەنجومەنی زانكۆی سەڵاحەدین دوپاتیدەكەینەوە: بەزاندنی حەرەمی زانكۆ دەستبردنە بۆ پیرۆزییەكانی خوێندن و شێواندنی كلتور و بەها نیشتمانییەكان، بۆیە دڵنیایی دەدەین بەسەرجەم مامۆستایانی زانكۆكان و كۆمیونیتی ئەكادیمی و خەڵكی كوردستان كە پێكەوە كار دەكەین بۆ پاراستنی سەروەری یاساو بەدیهێنانی دادپەروەری.
هەر لە كۆبونەوەكەدا د.ئارام محەمەد قادر ئاماژەی بەهەوڵەكان كرد بۆ ئەم كەیسەو رایگەیاند: وەزارەتی خوێندنی باڵاو توێژینەوەی زانستی بڕیاری پێویستی دەركردوە بۆ ئەنجامدانی رێكاری پەروەردەیی و زانستی و یاسایی، بۆ رێگەگرتن لە دووبارە بونەوەو تەشەنەسەندنی ئەم روداوە دڵتەزێنانە، بۆ ئەم مەبەستەش لیژنەی پەروەردەیی و زانستی و یاسایی پێویستمان بۆ بەدواداچونی رەهەندە جیاجیاكانی ئەم روداوە نەخوازراوە پێكهێناوە.
لەبەشێكی دیكەی كۆبونەوەكەدا بریكاری وەزارەت و سەرجەم ئەندامانی ئەنجومەنی زانكۆی سەڵاحەدین، وێڕای جەختكردنەوە لەسەر سەروەری یاساو چەسپاندنی دادپەروەری لە كەیسی شەهیدانی مامۆستایانی زانكۆی سەڵاحەدین، دوپاتیانكردەوە دەبێت هەمو مامۆستایان و خوێندكاران و كۆمیونیتی ئەكادیمی و زانكۆكان پێكەوە هەماهەنگ بین بۆ ئەوەی ببینە بەربەست و نەهێڵین ئەم دیارەدە دزێوانە جارێكی تر بپەڕنەوە ناو حەرەمی زانكۆكانمان و پەرەبسێنێت.
PUKmedia