سه‌رۆك بافڵ: ئێمه‌ له‌سه‌ره‌تاوه‌ له‌گه‌ڵ سازان و لێكتێگه‌یشتن و گفتوگۆدا بووین

بافڵ جه‌لال تاڵه‌بانی، سه‌رۆكی یه‌كێتیی نیشتمانیی كوردستان له‌ ماڵی مام له‌ به‌غدا پێشوازیكرد له‌ ره‌ییان كلدانی، ئه‌مینداری گشتیی بزووتنه‌وه‌ی بابلیون.

له‌ دیداره‌كه‌دا بافڵ جه‌لال تاڵه‌بانی تیشكی خسته‌سه‌ر دوایین گۆڕانكاری و هه‌وڵه‌كان بۆ پێكهێنانی حكومه‌تی نوێی عیراق و رایگه‌یاند، ئه‌گه‌ر بمانه‌وێت حكومه‌تێكی به‌هێز بونیادبنێین و سیاده‌ی وڵات بپارێزین، ئه‌وا پێویسته‌ هه‌موو نه‌ته‌وه‌، پێكهاته‌ و مه‌زهه‌بییه‌كان له‌به‌رچاو بگیرێن و رۆڵیان هه‌بێت له‌ حكومه‌تی داهاتووی عیراقدا، تایبه‌تمه‌ندی عیراق به‌و شێوه‌یه‌یه‌ و ده‌بێت رێز له‌ هه‌موولایه‌ك بگیرێت.

له‌باره‌ی چاره‌سه‌ركردنی كێشه‌كان و ده‌ربازكردنی عیراق له‌و دۆخه‌ نه‌خوازراوه‌ی تێیكه‌وتووه‌ سه‌رۆك بافڵ رایگه‌یاند، ئێمه‌ له‌ سه‌ره‌تاوه‌ له‌گه‌ڵ سازان و لێكتێگه‌یشتن بووین و بڕوامان به‌ زمانی گفتوگۆ هه‌بووه‌، چونكه‌ پێمانوایه‌ ئه‌وه‌ ته‌نیا چاره‌سه‌ره‌ و ده‌بێت هه‌موومان پێكه‌وه‌ هه‌وڵی به‌رپرسیارانه‌ و نیشتمانییانه‌ بده‌ین بۆ زاڵبوون به‌سه‌ر كێشه‌ و ئاڵنگارییه‌كان.

PUKmedia