بافڵ جەلال تاڵەبانی: پاراستنی ئاسایشی هەولێر و خەڵكەكەی بە ئەركی خۆمان دەزانین

سەبارەت بە هێرشەكەی شەوی رابردووی سەر شاری هەولێر،‌ بافڵ جەلال تاڵەبانی پەیامێكی بڵاوكردەوە و رایگەیاند، پاراستنی ئاسایشی هەولێر و سەلامەتی گیانی خەڵكەكەی بە ئەركی خۆمان دەزانین و بەتوندی ئیدانەی ئەو هێرشانە دەكەم، هاوكات هیوای سەلامەتی بۆ خەڵكی خۆشەویستی شارەكەش دەخوازێت.

دەقی پەیامەكە:

‎بەداخەوە جارێكی تر ئارامی و ئاسایشی هەرێمی كوردستان كرایە ئامانج و شاری هەولێری خۆشەویست رووبەڕووری هێرشێكی تیرۆریستی بووەوە. بەتوندی ئیدانەی ئەو هێرشانە دەكەم و هیوای سەلامەتی بۆ خەڵكی خۆشەویستی هەولێر دەخوازم.

‎دووبارەبوونەوەی ئەو هێرشانە مایەی نیگەرانییە و ئاماژەیەكی روونە بۆ تێكدانی سەقامگیری هەرێمی كوردستان. ئەركی هەموومانە پێكەوە پارێزگاری لە خاك و خەڵكەكەمان بكەین و رووبەڕووی تەحەدییەكان بوەستینەوە. 

‎پاراستنی ئاسایشی هەولێر و سەلامەتی گیانی خەڵكەكەی بە ئەركی خۆمان دەزانین. یەكێتیی نیشتیمانیی كوردستان ئامادەی هەموو پشتیوانی و هاوكارییەكە بۆ دۆزینەوەی تاوانباران و ئەنجامدەرانی هێرشە تیرۆریستییەكە.

‎بافڵ جەلال تاڵەبانی

PUKmedia تایبەت