فه‌یسه‌ڵ كه‌ریم خان: به‌ چه‌ندین ڕێگه‌ی جیاوازو مه‌ترسیدار یاری به‌ ده‌نگه‌كانمان كراوه‌

فه‌یسه‌ڵ كه‌ریم خان: هیچ هه‌ڤاڵێكی یه‌كێتی به‌شێك نییه‌ له‌ پیلانی یاریكردن به‌ ده‌نگه‌كان، به‌ڵكو  پشتیوان و هاوكارمان بون له‌ پێش پرۆسه‌ی هه‌ڵبژاردن و دوای پرۆسه‌كه‌ش
له‌ راگه‌یه‌نرایه‌نراوێكدا فه‌یسه‌ڵ كه‌ریم خان مه‌حمود برادۆستی ئاشكرایده‌كات،  دوای سه‌عات (11)ی شه‌وی 10ی ئۆكتۆبه‌ر، یارییه‌كی مه‌ترسیدار و به‌ چه‌ندین ڕێگه‌ی جیاواز جیاواز به‌ ده‌نگه‌كانتان كرا، به‌ جۆرێك كه‌ ژماره‌كان له‌ هه‌ر شوێنه‌ و به‌ جۆرێك ده‌خوێنرانه‌وه‌، بۆیه‌ ده‌نگده‌رانمان دڵنیا ده‌كه‌ینه‌وه‌ كه‌ له‌ ده‌نگه‌كانتان خۆشنابین و سكاڵای یاسای تۆمار ده‌كه‌ین و ته‌واوی شریتی ده‌نگدان و به‌ڵگه‌ و دۆكۆمێنته‌كان ڕاده‌ستی لایه‌نه‌ په‌یوه‌ندیداره‌كان ده‌كه‌ین، هه‌روه‌ها ده‌ڵێت هه‌موو ئه‌و ده‌نگۆیانه‌ ڕه‌تده‌كه‌ینه‌وه‌ كه‌ گوایه‌ هه‌ڤاڵێكی یه‌كێتی به‌شێك بێت له‌ یاریكردن به‌ ده‌نگه‌كانه‌وه‌، به‌پێچه‌وانه‌وه‌ هه‌م هه‌ڤاڵی هاوسه‌رۆك- هه‌ڤاڵ بافڵ تاڵه‌بانی و هه‌م هه‌ڤاڵ قوباد تاڵه‌بانی و هه‌ڤاڵ ده‌رباز كۆسره‌ت ڕه‌سوڵ و ته‌واوی ئه‌ندامانی مه‌كته‌بی سیاسی یه‌كێتیی نیشتمانیی كوردستان، چۆن له‌ بانگه‌شه‌كه‌دا پشتیوان و هاوكارمان بون ئێستاش به‌ جۆش و خرۆشێكی زۆره‌وه‌ له‌ هه‌وڵی به‌رده‌وامدان بۆ گێڕانه‌وه‌ی ده‌نگه‌ دزراوه‌كانتان. 


به‌ناوی خودای گه‌وره‌ و میهره‌بان 
كۆمه‌ڵانی خه‌ڵكی كوردستان 
هاونیشتیمانییانی خۆشه‌ویست

كه‌س و كاری سه‌ربه‌رزی شه‌هیدان، پێشمه‌رگه‌ و فه‌رمانده‌ ئاسایش و هێزه‌كانی ناوخۆ، كه‌مئه‌ندامانی سه‌نگه‌ر، ده‌نگده‌ر و دانیشتوانی ده‌ڤه‌ری سۆرانی سه‌ربه‌رز. ده‌مه‌وێت له‌سه‌ره‌تادا له‌ ناخی دڵمه‌وه‌ سوپاس و پێزانینی خۆم ئاڕاسته‌ی په‌رۆشی و خه‌مخۆری و دڵگوشراویتان بكه‌م بۆ به‌ ئومێده‌وه‌ چاوه‌ڕوانبوون له‌ ئه‌نجامی هه‌ڵبژاردنه‌كانی په‌رله‌مانی عیراق. 

مه‌به‌ستمه‌، سوپاس و پێزانینی بێ پایانم ئاڕاسته‌ی ته‌واوی خه‌ڵكی ده‌ڤه‌ری سۆران بكه‌م بۆ به‌ده‌نگه‌وه‌ هاتن و پێشوازی گه‌رم و باوه‌ش كردنه‌وه‌تان بۆ سه‌رخستنی به‌نده‌ بۆ په‌رله‌مانی عیراق، و مسۆگه‌ر جۆش و خرۆش و په‌رۆشیتان بۆ هه‌میشه‌ له‌ یاد و یاده‌وه‌ریماندا ده‌مێنێته‌وه‌. 

سوپاسی هه‌ر كه‌سێك ده‌كه‌م چی به‌ ده‌نگدان یان به‌ هاندانی هاووڵاتییان به‌شداربوون له‌م پڕۆسه‌یه‌ و سوپاسی نه‌بڕاوه‌ی په‌رۆشی و به‌شداری كاراتان ده‌كه‌م له‌ سه‌رخستنی پڕۆسه‌كه‌دا. بێگومان، ئه‌مه‌كدار و به‌ وه‌فا ده‌بین به‌رامبه‌ر به‌و متمانه‌ و جۆش و خرۆشه‌ی ئێوه‌ی سه‌ربه‌رز و پشتیوانیتان زامنی به‌رده‌وامی و سوورتركردنمانه‌ بۆ خزمه‌تكردنی ئێوه‌ی به‌ ئه‌مه‌ك و وه‌فادار. 

كۆمه‌ڵانی خه‌ڵكی كوردستان،

دوای ته‌واوبوونی پڕۆسه‌ی ده‌نگدان، له‌ ڕێگه‌ی چه‌ند تیمێكی شاره‌زاوه‌ ته‌واوی شریته‌كانی ده‌نگدانمان كۆكردنه‌وه‌ و لای خۆمان پاراستمانن. دوای كۆكردنه‌وه‌ی كۆی ده‌نگه‌كان، سه‌رباری چاوسووركردنه‌وه‌ و ترساندن و گزیكردن، ژماره‌ی ده‌نگه‌كانی به‌نده‌ گه‌یشتنه‌ نزیكه‌ی (٢٨،٠٠٠) بیست و هه‌شت هه‌زار ده‌نگ و به‌مه‌ش زیاتر له‌ پێویستی كورسییه‌كی په‌رله‌مانیمان مسۆگه‌ر كرد.

به‌ڵام دوای سه‌عات (11)ی شه‌وی ١٠ی ئۆكتۆبه‌ر، یارییه‌كی مه‌ترسیدار و به‌ چه‌ندین ڕێگه‌ی جیاواز جیاواز به‌ ده‌نگه‌كانتان كرا، به‌ جۆرێك كه‌ ژماره‌كان له‌ هه‌ر شوێنه‌ و به‌ جۆرێك ده‌خوێندرانه‌وه‌. 

ئێمه‌ ئێوه‌ی سه‌ربه‌رز دڵنیا ده‌كه‌ینه‌وه‌ كه‌ له‌ ده‌نگه‌كانتان خۆشنابین و سكاڵای یاسای تۆمار ده‌كه‌ین و ته‌واوی شریتی ده‌نگدان و به‌ڵگه‌ و دۆكیمێنته‌كان ڕاده‌ستی لایه‌نه‌ په‌یوه‌ندیداره‌كان ده‌كه‌ین. 

هه‌رچه‌نده‌، ئاسووده‌ین كه‌ پشتیوانی و خه‌مخۆری ئێوه‌ بۆ پڕۆسه‌كه‌ زیاتره‌ له‌ چه‌ندان مه‌قعه‌دی په‌رله‌مانی، به‌ڵام ده‌نگه‌كانتان ئامانه‌تن و به‌رگری جیددییان لێده‌كه‌ین تا ده‌گه‌ینه‌ ئه‌نجامی كۆتایی. 

لێره‌شه‌وه‌ هه‌موو ئه‌و ده‌نگۆیانه‌ ڕه‌ت ده‌كه‌ینه‌وه‌ كه‌ گوایه‌ هه‌ڤاڵێكی یه‌كێتی به‌شێك بێت له‌ یاریكردن به‌ ده‌نگه‌كانه‌وه‌، به‌پێچه‌وانه‌وه‌ هه‌م هه‌ڤاڵی هاوسه‌رۆك- هاڤاڵ بافڵ تاڵه‌بانی و هه‌م هه‌ڤاڵ قوباد تاڵه‌بانی و هه‌ڤاڵ ده‌رباز كۆسره‌ت ڕه‌سوڵ و ته‌واوی ئه‌ندامانی مه‌كته‌بی سیاسی یه‌كێتیی نیشتمانیی كوردستان، چۆن له‌ بانگه‌شه‌كه‌دا پشتیوان و هاوكارمان بون ئێستاش به‌ جۆش و خرۆشێكی زۆره‌وه‌ له‌ هه‌وڵی به‌رده‌وامدان بۆ گێڕانه‌وه‌ی ده‌نگه‌ دزراوه‌كانتان. 

له‌ كۆتایدا ده‌مه‌وێت بڵێم، ته‌واوی ئه‌نجامه‌ به‌راییه‌كان ڕه‌تده‌كه‌ینه‌وه‌ چونكه‌ یارییه‌كی مه‌ترسیدار به‌ ده‌نگه‌كانتان كراوه‌، و زیاتر له‌ ١٦١ سندوقیش تا دوێنێ نه‌نێردرابوون بۆ به‌غدا، كه‌ 80 سندوق له‌ ناویاندا هی بازنه‌ی یه‌كی سۆرانن؛ دڵنیاشتان ده‌كه‌مه‌وه‌ كه‌ ده‌نگی ئێوه‌ ئامانه‌ته‌ و ته‌واوی ده‌نگه‌كانتان به‌ ئامانه‌ته‌وه‌ سه‌یر ده‌كه‌ین و پاراستنییان به‌ ئه‌ركی له‌ پێشینه‌مان ده‌زانین، و دڵنیابن هه‌موو ڕێكاره‌ یاساییه‌كان ده‌گرینه‌ به‌ر بۆ ڕێگه‌گرتن له‌ دزینی ده‌نگه‌كانتان. 

فه‌یسه‌ڵ كه‌ریم خان محمود برادۆستی 
١٢ی ئۆكتۆبه‌ری ٢٠٢١

PUKmedia