داھاتی فرۆشتنی نه‌وتی عیراق زیاد ده‌كات

وه‌زاره‌تی نه‌وتی عیراق بڕی نه‌وتی ھه‌نارده‌كراو و داھاته‌كه‌ی له‌ مانگی ته‌مموزی ڕابردوو ئاشكرا ده‌كات و ئاماژه‌ به‌رزبوونه‌وه‌ی نرخی نه‌وت و داھاته‌ به‌ ده‌ستھاتووه‌كانیش ده‌كات له‌ مانگی ڕابردودا.

به‌پێی داتاكانی ھه‌نارده‌ی نه‌وت، له‌لایه‌ن كۆمپانیای سۆمۆوه‌ دراوه‌ به‌ وه‌زاره‌تی نه‌وتی عیراق، له‌ مانگی ته‌مموزی رابردوو بڕی ٩٠ ملیۆن و ٤٦٧ ھه‌زار و ٧٩٤ به‌رمیل نه‌وت ھه‌نارده‌ی بازاڕه‌كانی جیھان كراوه‌.

ھه‌ر له‌ به‌یاننامه‌كه‌ی وه‌زاره‌تی نه‌وتدا ھاتووه‌، كۆی داھاتی به‌ده‌ستھاتووی نه‌وتی ھه‌نارده‌كراو شه‌ش ملیار و ٤٧٥ ملیۆن و ٥١٢ ھه‌زار دۆلار بووه‌، ئه‌مه‌ش به‌راورد به‌ مانگی پێشوو ڕووی له‌ زیادبوون كردووه‌.

وه‌زاره‌تی نه‌وتی عیراق ده‌ڵێت، به‌ھۆی به‌رزبوونه‌وه‌ی به‌ھای نه‌وت له‌ بازاڕی جیھانیدا ھه‌ر به‌رمیلێك نه‌وت به‌ ٧١ دۆلار و ٥٧ سه‌نت فرۆشراوه‌ .

PUKmedia ئاژانسه‌كانی عیراق