ئه‌سێ ده‌بێته‌ تاكه‌ بریكاری كۆمپانیای LG له‌عیراق

.

ئێواره‌ی ئه‌مڕۆ 12-3-2018 كۆمپانیای ئه‌سێ له‌ مه‌راسیمێكی شایسته‌دا بۆ یه‌كه‌مجار له‌ عیراق و هه‌رێمی كوردستان بریكارنامه‌ی له‌كۆمپانیای LG بۆ مۆبایل وه‌رگرت.

له‌و باره‌یه‌وه‌ لاوه‌ عه‌بدولڕه‌حمان به‌ڕێوه‌به‌ری گشتی كۆمپانیای ئه‌سێ به‌ PUKmedia ی راگه‌یاند: وه‌رگرتنی بریكارنامه‌ی كۆمپانیای LG بۆ مۆبایل له‌عیراق و هه‌رێمی كوردستان به‌ كۆمپانیای ئه‌سێ ده‌ستكه‌وتێكی گرنگی ئابوورییه‌ بۆ عیراق به‌گشتی و هه‌رێمی كوردستان به‌تایبه‌تی و له‌مه‌ودوا ئه‌سێ ده‌بێته‌ بریكاری ره‌سمی كۆمپانیای LG و سه‌رجه‌م به‌رهه‌مه‌كانی LG یمان لا ده‌ست ده‌كه‌وێت.

وتیشی: وه‌ك چۆن له‌ئێستادا كۆمپانیای ئه‌سێ پێشه‌نگه‌ له‌ جۆره‌ نوێیه‌كانی مۆبایلی سامسۆنگ و ئایفۆن، به‌هه‌مان شێوه‌ش پێشه‌نگ ده‌بین له‌ خسته‌ بازاڕی جۆره‌ نوێیه‌كانی مۆبایلی LG.

به‌ڕێوه‌به‌ری گشتی كۆمپانیای ئه‌سێ ئه‌وه‌شی خسته‌ڕوو: سێرڤزی تایبه‌تمان بۆ به‌كارهێنه‌رانی LG له‌ هه‌رێمی كردستان و عیراق هه‌یه‌ و هه‌وڵده‌ده‌ین له‌گه‌ڵ كۆمپانیای LG ببینه‌ جێی خواستی به‌كارهێنه‌رانی مۆبایل.

ئێواره‌ی ئه‌مڕۆ له‌ مه‌راسیمێكی تایبه‌تدا به‌ئاماده‌بوونی پارێزگاری سلێمانی و ژماره‌یه‌كی زۆر له‌ په‌رله‌مانتاران و میوانان و راگه‌یاندنكاران، كۆمپانیای ئه‌سێ بریكارنامه‌ی ره‌سمی له‌ كۆمپانیای LG بۆ مۆبایل وه‌رگرت و له‌ وته‌یه‌كیشدا به‌ زمانی كوردی دانیاڵ جی به‌ڕێوه‌به‌ری گشتی كۆمپانیای LG له‌ عیراق و سوریا پیرۆزبایی له‌ كۆمپانیای ئه‌سێ كردو هیوای خواست به‌یه‌كه‌وه‌ بتوانن زیاتر جۆره‌كانی مۆبایلی LG به‌ به‌كارهێنه‌ران بناسێنن و مۆبایلی LG بكه‌نه‌ جێی خواستی به‌كارهێنه‌رانی مۆبایل.

PUKmedia دیار ستار