ئایفۆنی 8 ده‌گاته‌ بازاڕه‌كانی كوردستان

.

ئه‌مڕۆ 23-9-2017 كۆمپانیای ئه‌سێ له‌ سلێمانی به‌ ره‌سمی ئایفۆنی 8ی خسته‌ بازاڕه‌كانی كوردستانه‌وه‌ و نرخ و ره‌نگ و تایبه‌تمه‌ندیه‌كانیشی ئاشكرا كرد.

باوه‌ڕ جه‌مال به‌ڕێوه‌به‌ری ڕاگه‌یاندنی كۆمپانیای ئه‌سێ له‌ كۆنگره‌یه‌كی رۆژنامه‌وانیدا گه‌یشتنی مۆبایلی ئایفۆن 8ی ئاشكرا كردو ڕایگه‌یاند: ئێمه‌ له‌ كۆمپانیای ئه‌سێ وه‌ك یه‌كێك له‌ فرۆشیارانی ئامێره‌كانی ئه‌پڵ له‌ عیراق و هه‌رێمی كوردستاندا خۆشبه‌ختانه‌ ئه‌مڕۆ توانیمان هاوشێوه‌ی ساڵانی پێشوو شانبه‌شانی ته‌واوی وڵاتانی ئه‌وروپا و ئه‌مریكا هه‌مان ڕۆژی خستنه‌ڕووی ئامێره‌كه‌ , ئێمه‌ش ئامێری ئایفۆن 8 له‌ هه‌رێمی كوردستان بفرۆشین, ئه‌مه‌ش به‌ ده‌ستكه‌وتێكی مه‌زن ده‌زانین له‌ بواری ته‌كنه‌لۆژیادا كه‌ وه‌ك وڵاتانی پێشكه‌وتوو ئامێره‌كان بخه‌ینه‌ به‌رده‌ستی هه‌وارداران.

سه‌باره‌ت به‌ نرخه‌كانیش وتی: له‌ سه‌ره‌تادا نرخه‌كان كه‌مێك به‌رزن، به‌ڵام خۆشبه‌ختانه‌ له‌ چاو ساڵانی ڕابردوودا نرخه‌كه‌ی زۆر گونجاوه‌ و ئامێره‌كان به 895 دۆلار ده‌فرۆشرێن.

له‌ وه‌ڵامی پرسیارێكی په‌یامنێری PUKmedia دا سه‌باره‌ت به‌ ڕه‌نگ و تایبه‌تمه‌ندیيه‌كانی مۆبایله‌ نوێیه‌كه‌ ، باوه‌ڕ جه‌مال وتی: ئه‌وه‌ی ئه‌م ئامێره‌ جیا ده‌كاته‌وه‌ له‌ نه‌وه‌كانی پێش خۆی ئه‌وه‌یه‌ كه‌ مۆبایله‌كه‌ به‌ وایه‌رلێس شه‌حن ده‌كرێته‌وه‌ و دژه‌ ئاو و ته‌پوتۆزه‌ و به‌ سیستمی كارپێكه‌ری ios 11 كار ده‌كات، هه‌روه‌ها به‌ ڕه‌نگه‌كانی گۆڵد و سلڤه‌ر و په‌مه‌یی خراوه‌ته‌ بازاڕه‌وه‌.

له‌كۆتایشدا به‌ڕێوه‌به‌ری ڕاگه‌یاندنی كۆمپانیای ئه‌سێ وتی: ئایفۆن ئێكس هێشتا نه‌فرۆشراوه‌و وا بڕیاره‌ له‌ 2-11-2017 بخرێته‌ بازاڕه‌كانه‌وه‌.

PUKmedia  گۆران قادر