تەعزیم سەلام

ستران عەبدوڵڵا

میمكە (فەهیمە ئەمین حەسەن)
دایكی شەش شەهید و خوشكی دوو شەهیدە.

یانی وایە كە دایكی شەهیدانی یەكێتی و شۆرشەكەیەتی، وایە كە دەبێ ناو بنرێ دایكی شەهیدپەروەر. وایە كە ئیتر هیچ منەتێكی خەبات شان لە شانی نادا و دەبێ لە ناوهێنانیا خۆی وەشارێ.

ژنێكی كورد و كوردستانی كە هەشت جار خورپە لە دڵییەوە بەرپا بووە..

دوو جار بۆ برای گیانی بە گیانی و شەش جار بۆ جەرگ و دەرماری خوێن : كوڕەكانی ئەم ژنە  ئەفسانە بووە لەسەر ئەرز و لە ناو شار و ئاوایی ئێمە. رۆمانێكی هەشت جڵدی هەزاران لاپەڕەیی كە هەر بەرگێكی ناونیشانێكە: یەكەم كسپەی دڵ، یەكەم ژوان لەگەڵ خەم و خەفەت،  ئازار دێتەوە و پەژارە ناسرەوێ،  خوێنیان خەڵات و بەراتی ئازادییە، هیچ شتێك بەهای خوێنی رژاوی نییە و  مەشقی یۆگا لەگەڵ سەبر و شەكیب.. هتد.
ئیتر وایە سەد ناوی تری بۆ هەڵدە 

ئەمە ژنێكی ئازا و بە ئازاری كوردە دەڵێی ناتوانێ بە شیعر و پەخشان و دەربڕین بە كوردستان بڵێ :خۆشم دەوێی ئەی وڵات ، بۆیە بە زمان و ئیماچی سوور گوزارشت دەكات.
 
فەهیمە خان دوێنێ فەوتی كردووە و هەواڵی مەرگی یەكجارەكی هێشتا قوڵپ ئەدا لێ رۆژنامە و دەفتەر و دیوانی كوردی بێ چارە  لە مێژە هەیە و كەسمان كەرەممان نەكرد تۆماری ئازارێكی گلدەینەوە،  بۆ وەفا و رێزگرتن و ئەمەك نا ، كە هیچ شتێك قەرەبوو نییە بۆ ئازاری  شەهادەت و بەهای دیار نەمانی  ئازیزان، بەڵكو بۆ پەند و  بۆ وانەی ژیان و بۆ  نەفرەتی زیانی شەخسی و كوێربوونەوەی  كانیاوی ئاوەدانی و چرای داهاتوو لەماڵێكی كوردەواری .

نەوەكان لە كوێن و نەبەردییەكانی مانەوەی فەهیمە خان لە چ پریاسكەیەك توند گرێدراون و لە ناو كام قوژبن و سندوقی بوراقی  یادەكان هەڵگیراون؟

شەش كوڕە شەهید و دوو برای فەرماندە و تەمەنێكی كۆڵنەدان كە دواجار بڕیاری كۆتایی وابوو حیساب پاكتاو بكا، دەفتەری رزیو دابخا و هیچ قەرزێك بە ساڵی ٢٠٢٦ نەسپێرێ.

ئەفسانەیەك بە جلوبەرگی كوردی و خۆڕاگریەك بە ناونیشانی گەرمیان و كوردستان و دەشتی پان و فراوانی زەنگەنە كە قاموسێكی دەوڵەمەندی شەهادەت و شەهامەت ، گیانبازی و مانەوەیە.

ئەم دایكە چەندین دەیە زۆرانبازی لەگەڵ مەرگ و خوێن و برین كردووە و چەند جار بەزاندویەتی تا  دوا جار   عەساكەی فڕێدا و گوتی دیداری ئازانم پێ خۆشترە لە ژیانی  پڕ مەینەتی سەر زەمین و رۆژی بە منەتی زەمانی ئێستا.
رۆیشت و گوتی :بەسە ! خۆ كوردستان  هەر تاپۆی خزمەتی من و كوڕ و براكانم نییە؟! 
رۆیشت و زمانی 
 حاڵی وایە ئەم نیشتمانە قەدیمە ، لە زەمانی گەزنفۆنەوە هەیە و  لێی مەترسن ، هەر هەیە و هەر دەمێنێ.
خوێنی شەهید ئاوی دەدا و مانەوەی گەش و سەوز دەكاتەوە.
لەمەی هێمن، شینگێری  شەهیدان جوانتر نییە بۆ ئەم تەعزیم سەلامە:

(نایەڵێ دوژمن بە ڕەنگە زەردەكەی من پێكەنێ
تا دەمی مردن ئەمن مەمنوونی فرمێسكی گەشم)

PUKMEDIA