سیاسەت و خەڵك.. لە پەراوێزی (زاخۆ) ویستانی كوردستان

ژینەر محەمەد

لە سیاسەتدا شتێك هەیە ناوی جوگرافیای سیاسییە و شتێكی دیكەش هەیە پێی دەڵێن: جوگرافیای خەڵك، چەمك و دیفاكتۆی یەكەمیان بۆ كوردستان ئاساییە، كە بەسەر دوو زۆن و ناوچەدا دابەش بووبێت و هەر یەك لە هێزە قەڵەمڕەوەكان لەڕێگەی هەژموونەوە ناوچەی خۆیان خۆش بوێت و بایەخی پێبدەن و بیكەن بە جێگەی نفوز و باڵایی، بەڵام لە ئاستی دووەمیاندا كە جوگرافیای خەڵك و دانیشتوانە پێوانە سیاسییەكان دەگۆڕێن بۆ پرسێكی باڵاتر و شوناسی كوردبوون جێگەیان دەگرێتەوە و لەدەرەوەی ناكۆكی و بەریەككەوتنە سیاسییەكان هەم پارت و حزبەكان، هەم خەڵك و جەماوەر شتە كاتییەكان تێدەپەڕێنن و لە یەك سیاقدا یەكدەخرێن.

لە ماوەی رابردوودا دیاریكردنی هاندەرانی یانەی زاخۆ وەك بژاردەیەك لەلایەن یەكێتی تۆپی پێی نێودەوڵەتییەوە وەك باشترین جۆری هاندەری وەرزشی، بە تەنها یانسیب یان پێوانەكردنی رادەی جەماوەرییبوونی سنوور و جوگرافیایەك نییە، هەروەك ماركێتین نییە بۆ وێنە و گرتەیەكی ڤیدیۆیی كە كاریگەریی لەسەر دیدگای جیهانیی بووە، بەڵكو جۆرێكە لە تاقیكردنەوەیەكی نەتەوەییانە بۆ ئێمە كە جارێكی دیكە چێكی شوناس و ناسنامە كوردستانییەكەی خۆمان بكەینەوە و بە دنیای دەرەوەی خۆمانی بسەلمێنین كە كورد جگە لەوەی یەكگرتووە و بە یەك پاكێجی ئینتیما دەچێتە ركابەرییەكەوە، لە هەمانكاتدا دەشتوانێت وێنایەكی جیاواز پیشان بدات، كە سەرەڕای ئەزموونی لاواز و سەرەتایی وەرزشیی، بەڵام دەتوانێت بۆ وەرزش ببێتە براندێكی سەربەخۆ و لە كەسی دیكە نەچێت.

بە سەرنجدان لە میدیا وەرزشییە جیهانییەكان تێگەیشتم لەوەی كە هاندەرانی وەرزشی لە ئەرجەنتین و توركیا و ئینگلتەرا لەڕووی جۆش و خرۆشەوە بێ هاوتا و كەم وێنەن، بەڵام كاتێك زاخۆ و هاندەرانی دەبن بە دیاردەیەكی نوێی وەرزشی، بۆ هەموومان، ئەوانەی دۆستی وەرزشین یان نا، شانازییەكە لەگەڵ یەكتر بەش دەكەین و دەڵێین: لە هەوڵەكانی سەرخستنی زاخۆدا پێكەوە بووین و سنوورە سیاسییەكانمان نەزانی.

ئەم دیاردە و دیمەنە شێوەكەی لە سەرەتاكانی بەرنامەی هونەری (ئەرەب ئایدڵ) و جۆش و خرۆشی خەڵك دەچێت بۆ پشتگیریی لە كەسایەتی و مۆڕاڵی كوردی، چونكە كورد و كوردستانییەكان ئەو شتانەی پەیوەستە بە شوناسەوە دڕدۆنگییە سیاسییەكان، ناكۆكی و بەریەككەوتنەكان، كێشە و لێك تێنەگەیشتنەكان وەلا دەنێن و لە ژێر ناونیشانی (هەر كورد بووین و هەر كورد دەبین) هەوڵەكانیان چڕ دەكەنەوە، ئەمجارەش بە بەكارهێنانی هەموومان زاخۆیین هەر ئەو شتەمان كرد.

PUKMEDIA