شەهید نەمرە وەکو شاخ، وەکو درەخت، وەکو بەهار و گوڵەباخ

شوان کەریم کابان

چیرۆکی شەهادەت لای پێشمەرگەکانی یەکێتی، پڕن لە ئازایەتی و دەرس و عیبرەت و جوامێری

مێژووی خەبات و تێکۆشانی گەلەکەمان، چیرۆکێکی دوور و درێژی کارەسات و قوربانیدانە.
سەردەمێکی نییە، پڕ نەبێ لە گیان بەختکردن و خوێن بەخشین، ئەو کاروانە دوور و درێژە، بەخوێنی شەهیدەکان نەخشێنراوە و ئەوان سەرقافڵەی ئەم رێگا دوور و درێژەن کە هێشتا ئەوسەری دیارنییە.

 کە باسی شەهید و شەهادەت دەکرێت، ناکرێ باسی یەکێتیی نیشتیمانیی کوردستان و شەهیدەکانی نەکەین! هەموو حزبەکان، ئەوانەی لە خەباتی چەکداری و نهێنیدا بەشداربوون و دواتریش شەرەفی داکۆکییان لە کوردستان پێ بڕاوە، هەر کەسە و لە قەدەر خۆی تێکۆشاوە و شەهیدی بەخشیوە و هەموو شەهیدانی کوردستانیش سەروەر و رووناکی ئێستا و ئایندەمانن، بەڵام کاتێک دێینە سەر باسی خەباتی یەکێتی و کاروانی شەهیدانەکەی، ناچار دەبین، قووڵتر رۆچینە ئەم حاڵەتەوە. وەک چۆن یەکێتی رابەری شۆڕشێکی نوێی جیاواز بوو، ئاوهاش شەهید بەخشینەکەشی جیاواز بووە. 

هەر لە سەرەتای دامەزراندنی و پاش ساڵێک و چوار مانگ و نیو، سێ سەرکردەی بەئەمەک و بوێر، خاڵە شیهاب و کاک ئەنوەر و کاک جەعفەر، لە زیندانەکانی بەعسدا شەهیدکران و بوونە سەرقافڵەی کاروانەکە و سەرەتای کەم ژیان و کەڵ ژیانیان بۆ چەسپاندین.  پاش دوو ساڵیش، چوار سەرکردەی تری یەکێتی، عەلی عەسکەری، شاسوار جەلال ( ئارام )، حسێن بابە شێخ و دکتۆر خالد شەهید بوون، لە ماوەی ئەو دوو ساڵە و کارەساتی هەکاریدا، دەیان پێشمەرگە و کادر و فەرماندەی تری یەکێتی شەهیدبوون، ئەمە و دەیان رۆڵە و جوامێری تری یەکێتی گیانی خۆیان کردە قوربانیی لەپێناوی گەلەکەماندا لە خەباتی شاخ و ئەم نەریتەش هەتا ئێستاش بەردەوامە و نزیکەی 30 هەزار شەهید ئەم کاروانەیان رازاندووەتەوە. 

بەوپێیەی یەکێتی داکۆکیکاری هەموو سەردەمەکانە لە خاکی کوردستان، شەهید بەخشینەکەشی لە سەردەمێکدا قەتیس نەبووە و باشترین بەڵگەش شەڕی داعشە، کە یەکێتی لە پاراستنی خاکی کوردستان لە داگیرکاریی چەکدارانی داعشدا، نزیکەی هەزار و پێنج سەد پێشمەرگە و کادر و فەرماندەی گیانی خۆیان بەخشی، کە هەندێکیان نزیکەی چوار دەیە بوو پێشمەرگە بوون. 

چیرۆکی شەهادەت لای پێشمەرگەکانی یەکێتی، پڕن لە ئازایەتی و دەرس و عیبرەت و جوامێری، نامەی شەهیدانی زیندانەکانی رژێمی بەعسی رووخاو و بەسەرهاتی شەهیدانی سەنگەرەکانی بەرەنگاربوونەوە، وانەی فیداکاری و نەبەردیمان پێدەڵێنەوە و فێرمان دەکەن، رێگەی ئەو سەروەرانە بەرنەدەین و هەمیشە ئەو دێڕە شیعرەی شەهید مەلا عەلی-شمان بیر بێت، کە لە قەسابخانەکەی موسڵ بەر لە سێدارەدانی دەڵێت:

سەربەرزییە کە پێڵاوم ئەبینن... 
بەسەر سەری دوژمنەوە لە بەرزین

 دڵنیاش بین وەک شێرکۆی نەمر دەڵێت: 
شەهید سۆمای چاوە... 
کام دوا رۆژ دوورە ئەیبینێت
سڵاو لە گیانی پاکی سەرجەم شەهیدانی کوردستان و هەمیشە زیندوو بێت یاد و یادەوەرییان.

PUKMEDIA