یان ئۆینەرەم یان زیفلەرەم

د. یوسف گۆران

د. یوسف گۆران

کە منداڵ بوین، لەشاری کەرکوک چەندین ماڵی تورکمانی هاوسێمان بون، کە یاریمان دەکرد هەندێ منداڵی تورکمان قسەیەکی تورکمانییان بەکار دەهێنا و ئەیانوت:
(یان ئۆینەرەم یان زیفلەرەم)

‎ئەمەش بەو واتایەی ((یان یاری ئەکەم یان تێکی ئەدەم)) دیارە ئێمەش ئەو لۆجیکەمان دەزانی و وەکو ئەوانیش باسمان دەکرد، دیاریش بوو لە ناوەڕۆکدا ئەوان ئەیانویست یارییەک بکەن بەپێی یاساو حەزی خۆیان بێت، دەنا تێکی دەدەن و ناهێڵن ئێمەش یاری بکەین.

‎ئێستا هەندێ کەسایەتی سیاسی لە هەرێمەکەمان هەمان لۆجیک بۆ پێکهێنانی حکومەتی هەرێم پیادە دەکەن و، ئەڵێن یان دەبێ بە یارییەکەی ئێمە رازی بن و حکومەت دروست بکەین، یان تێکی ئەدەین و لەسەرەتاوە دەس پێ دەکەینەوە و هەڵبژاردنێکی دیکە ئەنجام دەدەین !!!
‌‎
مەغروریەتی سیاسی هیچکات یەکڕیزی نیشتمانی دروست ناکات، گەر یەکڕیزیتان دەوێت پێویستە بیرکردنەوەو هەڵسوکەوتتان بەو ئاراستەیە بێت.

‎ئەگەر ئێوە ئەتانەوێ رێساو یاساکانی یاریکردن بگۆڕن بۆچی پێتان سەیرە بەرامبەرەکەشتان بەهەمان شێوە بیربکاتەوە، یەکێتیش خەمخۆری سەرەکی مافەکانی خەڵکە، بەهەڵبژاردنیشەوە، چونکە هیچ کاتێک سڵى نەکردۆتەوە لە هەڵبژاردن بەتایبەت -بە پێچەوانەی لایەنی تر- لەم سێ ساڵەدا دەنگ و کورسی زیاد کردوە.