نابێت چیتر سەركێشی بەموچەی مووچەخۆرانەوە بكرێت

لوقمان وەردی

لە كۆبوونەوەی ئەنجومەنی دەوڵەت ، كێشەی نێوان هەرێم و بەغداد یەكلایی نەكرایەوە، بڕیاردرا بانگهێشتی دوو راوێژكاری یاسایی لەوەزارەتی دارایی و دادی هەرێم بكات، بۆ ئەوەی  رۆژی سێ شەممە پێش كۆبوونەوەی ئەنجومەنی وەزیران ڕای خۆی لەسەر كێشە یاساییەكانی نێوان حكومەتی هەرێم و حكومەتی عێراق سەبارەت بە داهاتی نانەوتی، بۆ ئەنجومەنی وەزیرانی عیراق بخاتە ڕوو.

ئێستا تۆپەكە لەگۆڕەپانی ئەو ئەنجومەنەیە ، حكومەتی هەرێم و عیراق، ڕای خۆیان لەسەر داهاتی نانەوتی داوەتە ئەنجومەنەكە، ئەویش راسپاردەی خۆی لەوبارەیەوە دەداتە ئەنجومەنی وەزیرانی عیراق و راسپاردەكەشی بۆ موچەخۆرانی هەرێم گرینگە و هەمووان چاوەڕێن كە چیتر یاری بەموچەی موچەخۆران و ژیانی زۆرینەی خەڵكی كوردستانەوە نەكرێت، دەبێ ئەو شەش موچەیەی نیوەی دووەمی ساڵی 2025 كە پێویستە بەغداد بە مەرجەكانییەوە بینێرێت، چارەسەری بەپەلە بكرێت.

بەداخەوە بارودۆخی ژیان و گوزەرانی فەرمانبەران و بازاڕەكانی كوردستان لەوپەڕی خراپیدایەو بۆیە بەرگریكردن لە ماف و شایستە داراییەكانی ژیانی خەڵكی كوردستان ئەركێكی یاسایی و نیشتمانیی و نەتەوەیی و ئەخلاقیە.

پێویستە حكومەتی هەرێم؛ لەپێناو تێپەراندنی ئەو دۆخە سەختە داراییە، نەرمی بنوێنێت سەبارەت بە بڕیارە چاوەڕوانكراوەكەی ئەنجومەنی دەوڵەت و بۆ ئەم شەش مانگەی موچەی مووچەخۆران، ئاستەنگ دروست نەكرێت و كارێك بكرێت، لانیكەم بۆ چارەسەركردنی ئەم پرسە، كە تاكو كۆتای ساڵ 2025/12/31 نەرمی بنوێندرێت و هەر ناكۆكییەك هەبێت، هەڵبگیرێت بۆ دوای هەڵبژاردنی 11ی11ی ئەم ساڵی عیراق و كابینەی نوێی حكومەتی عێراق و حكومەتی هەرێمی كوردستان.

ئەمەش لەپێناو ئەوەی موچەی ئەم شەش مانگەی موچەخۆرانی هەرێم نەفەوتێت، تەنانەت ئەگەر بە رادەستكردنی نەوتیش بێت، وەك چۆن پێشتر هەردوو حكومەتی هەرێم و عیراق لەسەری رێكەوتوون.

هەروەها ئەو ناكۆكییەی ئێستا هەیە لەسەر داهاتی نەوت و نانەوتی، چارەسەربكرێت و كێشەی  موچەی موچەخۆرانی هەرێم لەڕەگ و ڕیشەوە چارەسەر بكرێت.

*ئەندامی ئەنجومەنی سەركردایەتی یەكێتیی نیشتمانیی كوردستان

PUKMEDIA