زانیاری له‌باره‌ی روبه‌ڕوبوونه‌وه‌كانی ئه‌مڕۆی قه‌ره‌ته‌په‌

هێزه‌كانی پێشمه‌رگه‌ هیچ زیانێكی گیانیان به‌رنه‌كه‌وتووه‌

سه‌رله‌به‌یانی ئه‌مڕۆ 20-10-2014 تیرۆرستانی داعش له‌ چه‌ند قۆڵێكه‌وه‌ په‌لاماری پێشمه‌رگه‌یان دا، به‌ڵام ده‌ستبه‌جێ هێزه‌كانی پێشمه‌رگه‌ به‌توندی وه‌ڵامی هێرشه‌كانیان دایه‌وه‌و له‌ تیرۆرستان هاتنه‌ ده‌ست، وته‌بێژی هێزه‌كانی پێشمه‌رگه‌ش له‌ میحوه‌ری گه‌رمه‌سێر ئاماژه‌ بۆ ئه‌وه‌ ده‌كات كه‌ هیچ هه‌ڕه‌شه‌یه‌ك له‌سه‌ر ناحیه‌كه‌ نه‌ماوه‌و پێشمه‌رگه‌ به‌ وره‌یه‌كی پۆڵایینه‌وه‌ به‌رگری ده‌كه‌ن.

عه‌قید ئه‌حمه‌د له‌تیف وته‌بێژی هێزه‌كانی پێشمه‌رگه‌ له‌ میحوه‌ری گه‌رمه‌سێر به‌ PUKMedia ی راگه‌یاند: دوای ئه‌وه‌ی ئه‌مڕۆ تیرۆرستانی داعش له‌ چه‌ند قۆڵێكه‌وه‌ په‌لاماری هێزه‌كانی پێشمه‌رگه‌یان داو له‌ گوندێكی نزیك قه‌ره‌ته‌په‌وه‌ بۆردومانی ناو ناحیه‌كه‌یان كرد، به‌ڵام ده‌ستبه‌جێ هێزه‌كانی پێشمه‌رگه‌ لێیان هاتنه‌ ده‌ست و تۆپخانه‌كانی پێشمه‌رگه‌ش بۆردومانی ته‌واوی ئه‌و ناوچانه‌یان كرد كه‌ داعش لێیه‌وه‌ په‌لاماری قه‌ره‌ته‌په‌یان ده‌كرد.

وتیشی: له‌ ئێستادا هیچ مه‌ترسییه‌ك بۆسه‌ر ناوه‌ندی ناحیه‌ی قه‌ره‌ته‌په‌ نه‌ماوه‌و پێشمه‌رگه‌ به‌ وره‌یه‌كی پۆڵایینه‌وه‌ پارێزگاری له‌ ناحیه‌كه‌ ده‌كات.

هه‌روه‌ها ئاماژه‌ی بۆ ئه‌وه‌شكرد كه‌ هێزه‌كانی پێشمه‌رگه‌ هیچ زیانێكی گیانیان به‌رنه‌كه‌وتووه‌، به‌ڵام له‌ به‌رامبه‌ردا تیرۆرستانی داعش زیانی زۆریان به‌ركه‌وتووه‌و ته‌رمی 4 تیرۆرست له‌ده‌ستی پێشمه‌رگه‌دایه‌.

PUKMedia سامان عه‌لی