عیراق سیستەمی ئەلیكترۆنی جێبەجێ‌ دەكات

.

ئەمڕۆ پێنجشەممە خالید بەتال نەجم وەزیری پلاندانانی عیراق ئەوەی ئاشكرا كرد كە وەزارەتەكەیان كار لەسەر ئەوە دەكات لە رێگەی سیستەمێكی ئەلیكترۆنییەوە زانیاری لەسەر هاووڵاتیان كۆبكاتەوە و دواتر  بەسەر بەڕێوەبەرایەتییە گشتییەكانی تەندروستی پارێزگاكاندا دابەشی بكات.

ئەمڕۆ پێجشەممە بەتال لە لێدوانێكیدا بۆ دەزگاكانی راگەیاندن رایگەیاند كە وەزارەتی تەندروستی لەگەڵ بانكی نێودەوڵەتیدا كۆبۆتەوە و بەنیازن پرۆژەیەك لەسەر ئەركی بانكەكە جێبەجێ‌ بكەن كە تێیدا توێژینەوەیەك لەسەر لێكەوتەكانی پەتای كۆرۆنا بكەن.

لەو بارەیەوە گفتوگۆیان لەگەڵ بانكی نێودەوڵەتیدا كردووە كە سیستەمێكی ئەلیكترۆنی دروست بكەن و پاشان دابەشی بەڕێوەبەرایەتییە گشتییەكانی تەندروستی بكرێت و بە وەزارەتی تەندروستی و دەستەی ناوەندیی ئامار ببەسترێتەوە.

بەتال روونیشی دەكاتەوە كە وەزارەتەكەی بەنیازە لەڕێگەی ئەو سیستەمەوە زانیارییە تایبەتەكان لەسەر لەدایك بوون و مردن تۆمار بكرێت، تاوەكو ئەو زانیارییانە لەلای دەزگای ناوەندیی ئامار هەبێت و ئەوەش خزمەتێكە بە بواری پلاندانان لە كەرتی تەندروستی و هەروەها بووژاندنەوەی بەردەوامی كەرتە جیاوازەكانی تر.  

لەلایەكی تریشەوە، وەزیری پلاندانان رایگەیاند كە لەئێستادا لەلایەن كۆمپانیایەكی توركییەوە كار بۆ دروستكردنی دوو نەخۆشخانەی 400 قەرەوێڵەیی لە هەردوو پارێزگای نەجەف و كەربەلا و دوو نەخۆشخانەی 200 قەرەوێڵەیی لە قەزای حەدیسە و هیت  دەكرێت.

وەزیری پلانادان داواشی كردووە كە پەلە لەتەواوكردنی ئەو پرۆژانە بكرێت.

PUKmedia  ئاژانسی هەواڵەكانی عیراق