سه‌رۆك كۆمار سوپاسی كه‌رتی ته‌ندروستی ده‌كات

.

سه‌رۆك كۆمار د. به‌رهه‌م ساڵح، ئه‌مڕۆ چوار شه‌ممه‌ 10-6-2020 له‌ كۆشكی به‌غداد پێشوازیكرد له‌ حه‌سه‌ن محه‌مه‌د ته‌میمی وه‌زیری ته‌ندروستی و ژینگه‌ و د. مسته‌فا ھه‌یتی سه‌رۆكی سندوقی بونیادنانه‌وه‌ی ناوچه‌ زیان لێكه‌وتووه‌كان و ژماره‌یه‌ك له‌ سه‌رۆكی سه‌ندیكا پیشه‌ییه‌كان و كادرانی ته‌ندروستی.

له‌ په‌یامێكدا سه‌رۆك كۆمار رایگه‌یاند: ئێمه‌ لێره‌ین، بۆ ئه‌وه‌ی دووپاتی سوپاس و پێزانینی خۆمان بكه‌ینه‌وه‌ بۆ كادیره‌ ماندونه‌ناسه‌كانی كه‌رتی ته‌ندروستی؛ له‌ خاوه‌ن پیشه‌ پزیشكی و په‌رستارییه‌كان و كارمه‌ندانی دیكه‌ی وه‌زاره‌تی ته‌ندروستی، ئه‌وانه‌ی له‌م دۆخه‌ پڕ مه‌ترسی و ئالۆزه‌دا سه‌رقاڵی پێشكه‌شكردنی خزمه‌تگوزارییه‌كانن بۆ هاووڵاتیان، هه‌وڵ و قوربانیدان و ئازایه‌تیان جێگه‌ی شانازی و پێزانینی گه‌له‌كه‌تانه‌.

له‌ به‌شێكی دیكه‌ی په‌یامه‌كه‌یدا سه‌رۆك كۆمار رایگه‌یاند: گه‌له‌كه‌مان له‌ توانایدایه‌ ئه‌و ته‌نگه‌ژه‌ مه‌ترسیداره‌ تێده‌په‌ڕێنێ، ده‌توانێ رێز له‌ كۆششه‌ سه‌ركه‌وتوه‌كانتان بگرێ، ئه‌مه‌ش به‌وه‌ی چ به‌ تاك چ به‌ كۆمه‌ڵ كاری خۆپارێزی بكات، له‌وه‌ی به‌ته‌واوی پابه‌ندی رێ و شوێنی خۆپارێزی كه‌سی له‌ په‌تاكه‌ و پاراستنی كۆمه‌ڵگه‌دا بین.

له‌ درێژه‌ی په‌یامه‌كه‌یدا سه‌رۆك به‌رھه‌م وتی: هه‌موومان مه‌ترسیداری دۆخه‌كه‌ هه‌ست پێده‌كه‌ین كه‌ گه‌یشتووه‌ته‌ راده‌یه‌ك ئه‌وه‌ به‌سه‌ر هه‌موواندا ده‌سه‌پێنێ له‌ هاووڵاتی و دامه‌زراوه‌ و ده‌وڵه‌ت كه‌ تا ئه‌و په‌ڕی ڕاده‌ سووربن له‌سه‌ر ده‌ستگرتن به‌ ژیانه‌وه‌، هه‌موومان داوای ئه‌وه‌مان لێده‌كرێ پارێزگاری له‌ ژیانی خۆمان و ئه‌وانی دیكه‌ش بكه‌ین.

له‌ كۆتایی په‌یامه‌كه‌دا سه‌رۆك كۆمار ئه‌وه‌ی روونكرده‌وه‌، له‌كاتێكدا سڵاو و پێزانینی خۆم ئاڕاسته‌ی ده‌زگای ته‌ندروستی نیشتمانی ده‌كه‌م، له‌ هه‌مان كاتیشدا ده‌ستخۆشی له‌ سه‌رجه‌م كارمه‌ندانی دامه‌زراوه‌ ئه‌منی و سه‌ربازی و خزمه‌تگوزارییه‌كان ده‌كه‌م بۆ ئه‌و رۆڵه‌ی له‌م دۆخه‌دا ده‌یگێڕن كه‌ پێویستی ئه‌وه‌مان ده‌خاته‌ سه‌ر شان هه‌موومان هاریكاری یه‌كتر بین.

PUKmedia راگه‌یاندنی سه‌رۆك كۆمار