ئه‌ڵمانیا ڕاگرتنی گه‌شته‌كانی تا مانگی ئاب درێژكرده‌وه‌

.

ئه‌مڕۆ چوارشه‌ممه‌ 10ی حوزه‌یرانی 2020 حكومه‌تی ئه‌ڵمانی له‌پێناوی پاراستنی گیانی هاوڵاتیه‌كانیدا له‌به‌رامبه‌ر مه‌ترسی كۆرۆنا تامانگی ئابی داهاتوو ڕاگرتنی گه‌شته‌كانی ده‌ره‌وه‌ی یه‌كێتی ئه‌وروپای بۆ 160 وڵات به‌ڕه‌چاوكردنی هه‌ندێك گه‌شت بۆ ئه‌و ولاتانه‌ی كه‌ڤایرۆسه‌كه‌یان تیا سنووردار كراوه‌ درێژكرده‌وه‌، ئه‌مه‌ جگه‌ له‌په‌یڕه‌وكردنی هه‌موو ڕێكاره‌كانی تێست و به‌دواداچوون وئه‌و كاره‌ پێویستانه‌ی كه‌له‌كاتی گه‌ڕانه‌وه‌ی هاوڵاتیه‌كانیدا ئه‌نجامی ئه‌ده‌ن.

 ئه‌م بڕیاره‌ی ئه‌ڵمانیا له‌كاتێكدایه‌ كه‌ڕێكاره‌كانی ڕوبه‌ڕوبونه‌وه‌ی كۆرۆنا له‌سه‌ر هاوڵاتیان سوك كراوه‌و به‌ ڕێنمایه‌كی چروپڕودسپلینی پاراستنی گیانی هاوڵاتیان مۆله‌تی كردنه‌وه‌ی بازاڕو ماركێت و كافتریاكانیان داوه‌.

حكومه‌تی ئیتیحادی ئه‌ڵمانیا ئه‌و بڕیاره‌شی هه‌ڵوه‌شانه‌وه‌ كه‌ ده‌بوایه‌ له‌ 15ی ئه‌م مانگه‌وه‌ بۆ 29 ده‌وڵه‌تی ئه‌وروپی گه‌شته‌كانی ئه‌ڵمانیا ده‌ستپێبكاته‌وه‌.
هه‌ر به‌پێی بڕیاری حكومه‌تی ئه‌ڵمانی ئه‌مڕۆ هۆشداریشیان داوه‌ته‌ هاوڵاتیان تا به‌پاپۆڕ سه‌فه‌ر نه‌كه‌ن ته‌نانه‌ت بۆ ئه‌و وڵاتانه‌ی كه‌قه‌ده‌غه‌شیان له‌سه‌ر نیه‌ ئه‌مه‌ش به‌هۆی ده‌ركه‌وتنی ڤایرۆسی كۆرۆنا له‌گه‌شته‌ ده‌ریایه‌كانی چه‌ندین وڵات دا.به‌پێی ئه‌م هۆشداریه‌ گه‌شتیاری ئه‌ڵمانی ناتوانێ بۆ گه‌شت و پشووی هاوینه‌ بچنه‌ توركیاو تونس و مه‌غریب و میسر ئه‌مه‌ش خۆی له‌خۆیدا گورزێكی گه‌وره‌یه‌ بۆ كه‌رتی گه‌شتوگوزاری ئه‌ڵمانی و ئه‌و وڵاتانه‌ش.

له‌بڕیاره‌كانی ئه‌مڕۆی حكومه‌تی ئه‌ڵمانیدا ئه‌وه‌ش هاتووه‌ هاوڵاتیانی یه‌كێتی ئه‌وروپاو وڵاتی سویسرا،به‌بێ كه‌ره‌نتینه‌ كردن له‌ 16ی حوزیرانه‌وه‌ ده‌توانن بێنه‌ ناو ئه‌ڵمانیاوه‌ و له‌21 ی ئه‌م مانگه‌شه‌وه‌ كه‌واده‌ی ده‌ستپێكردنه‌وه‌ی گه‌شته‌كانی ئیسپانیایه‌ ئه‌ڵمانیا له‌ڕێگه‌ی فرۆكه‌وه‌ ڕێگه‌ به‌ گه‌شتیاری بیانی ئه‌دات له‌ئیسپانیاوه‌ بێنه‌ ناو ئه‌ڵمانیا.

هه‌ر ئه‌مڕۆش 10ی حوزه‌یران  وه‌زیری ده‌ره‌وه‌ی یه‌كێتی ئه‌وروپا "جوزیب بوریل" ئاشكرایكرد هه‌فته‌ی داهاتوو كۆمیسیۆنی یه‌كێتی ئه‌وروپا پێشنیاری هه‌ڵگرتنی قه‌ده‌غه‌ی هاتوچۆی زه‌مینی نێوان وڵاتانی ئه‌وروپا تاوتوێده‌كات و ئه‌گه‌ری ئه‌وه‌ش هه‌یه‌ له‌ 1 ته‌موزی مانگی داهاتووه‌وه‌ ئه‌و قه‌ده‌غه‌یه‌ له‌نێوان ولاتانی یه‌كێتی ئه‌وروپا هه‌ڵبگیرێت.

PUKmedia شیهاب عوسمان – ئه‌ڵمانیا
سه‌رچاوه‌/ كه‌ناڵی فه‌رمی ئه‌ڵمانیا