ئۆپیك پڵه‌س ماوه‌ی كه‌مكردنه‌وه‌ی به‌رهه‌مێنانی نه‌وتی درێژكرده‌وه‌

.

ئه‌مڕۆ شه‌ممه‌ كۆمه‌ڵه‌ی (ئۆپیك پڵه‌س) كۆبوه‌وه‌ و له‌سه‌ر ئه‌وه‌ رێككه‌وتن كه‌ ماوه‌ی كه‌مكردنه‌وه‌ی به‌رهه‌مهێنانی نه‌وت بۆ مانگێكی تر درێژ بكرێته‌وه‌.

له‌راگه‌یه‌نراوێكی هاوبه‌شیاندا، وڵاتانی (ئۆپیك+) رێككه‌وتن كه‌  بڕی ئێستای كه‌مكردنه‌وه‌ی به‌رهه‌مهێنانی نه‌وت كه‌ 9 ملیۆن و حه‌وت هه‌زار به‌رمیله‌ هه‌تا كۆتایی مانگی ته‌مووز به‌رده‌وام بێت.

وڵاتانی (ئۆپیك كۆ) له‌سه‌ر ئه‌وه‌ش رێككه‌وتن كه‌ ئه‌و وڵاتانه‌ی له‌مانگه‌كانی ئایار و حوزه‌یراندا له‌ 100% پابه‌ندنه‌بوون به‌ كه‌مكردنه‌وه‌ی به‌رهه‌مهێنانی نه‌وت، ده‌بێت له‌مانگی ته‌مووزدا قه‌ره‌بووی ئه‌وه‌ بكاته‌وه‌و بڕێكی زیاتر له‌به‌رهه‌مهێنانی نه‌وت كه‌مبكاته‌وه‌.

وڵاتانی (ئۆپیك پڵه‌س) بڕیاریشیان دا كه‌ له‌ناوه‌ڕاستی مانگی ته‌مووزدا بۆ چاوخشاندنه‌وه‌ به‌دۆخی بازاڕی نه‌وت جارێكی تر كۆببنه‌وه‌.

وڵاتانی (ئۆپیك پڵه‌س) به‌نیازیشن هه‌موو مانگێك تاوه‌كو كۆتایی ئه‌مساڵ 2020 درێژه‌ به‌كۆبوونه‌وه‌كانیان بده‌ن.

جێی ئاماژه‌یه‌، به‌هۆی ڤایرۆسی كۆرۆناوه‌، نرخی نه‌وت دابه‌زینی به‌رچاوی به‌خۆیه‌وه‌ بینی و تووشی هه‌ره‌س بوه‌وه‌، بۆیه‌ وڵاتانی رێكخراوی ئۆپیك و هاوپه‌یمانه‌كانی تری ده‌ره‌وه‌ی رێكخراوه‌كه‌، له‌مانگی نیسانی رابردوودا بۆ پاڵپشتیكردن له‌ دابه‌زینی نرخی نه‌وت له‌بازاڕه‌كانی جیهاندا رێككه‌وتن له‌سه‌ر ئه‌وه‌ی ئاستی به‌رهه‌مهێنانی نه‌وت كه‌مبكه‌نه‌وه‌.

PUKmedia  ئاژانسه‌كان