راگەیەنراوی وەزارەتی پێشمەرگە لەبارەی پەلامارەكەی داعش

.

وەزارەتی پێشمەرگە لەبارەی پەلامارەكەی شەوی رابردووی داعش لەسنوری كوڵەجۆی گەرمیان راگەیەنراوێكی بڵاوكردەوەو تیایدا ئاماژەی بەوەداوە كە بەهۆی پەلامارەكەوە دوو پێشمەرگە شەهید بوون و سەرەخۆشی لەخانەوانەدەكەیان دەكات، دەشڵێت: بەم كارە چەپەڵ و ترسنۆكانەیان ناگەنە هیچ ئامانجێك و بەبازووی هێزی پێشمەرگە ئەفسانەی سەرهەڵدانەوەشیان پووچەڵدەكەینەوە.

دەقی بەیاننامەی وەزارەتی پێشمەرگە:

شەوی رابردوو لە ئەنجامی پەلامارێكی ترسنۆكانەی تاریك پەرستان و تیرۆریستانی داعش بۆ سەر سەنگەرەكانی پێشمەرگە، لە شارۆچكەی كوڵەجۆ لە سنووری گەرمیان، لەساتی راوەدوونان و بەرپەرچدانەوەی ئەو تیرۆریستانە، دوو پێشمەرگەی نەبەرد و ئازای سەر بە لیوای 5ی پیادەی وەزارەتی پێشمەرگە بە ناوەكانی (ئیسماعیل فارس رەسول، سووركێو حەمە رەشید) شەهید بوون.

پرسە و سەرخۆشیی خۆمان ئاراستەی خانەوادەو كەسوكاری سەربەرزی شەهیدانی شەوی رابردووی كوڵەجۆ دەكەین و هاوخەمی و هاوسۆزی خۆمانیان بۆ دووپاتدەكەینەوە.

بەخەڵكی كوردستان رادەگەینین، وێڕای ناهەمواری بارودۆخی هەرێمەكەمان و خراپی دۆخەكە بەهۆی پەتای كۆڕۆناوە، بەڵام وەك هەمیشە، هێزی گیانفیدای پێشمەرگە لە ئامادەسازی و ئامادەباشی تەواودایە بۆ بەرگریكردن لەخاك و خەڵكی كوردستان.

لەكاتێكدا، چەندین جار هۆشداریمان داوە لەسەر خۆڕێكخستنەوەی شانە نوستوەكانی داعش و سەرهەڵدانەوەیان، بەم كارە چەپەڵ و ترسنۆكانەشیان ناگەنە هیچ ئامانجێك و بەبازووی هێزی پێشمەرگە ئەفسانەی سەرهەڵدانەوەشیان پووچەڵدەكەینەوە، ئەمەش بە هاوكاری و هەماهەنگی لەگەڵ هێزەكانی ئاسایش و سوپای عیراق و هێزەكانی هاوپەیمانی نێوەدەوڵەتی دژ بەداعش.

نەمری بۆ شەهیدان

سەربەرزی بۆ خانەوادەكانیان

وەزارەتی پێشمەرگەی حكومەتی هەرێمی كوردستان

٨ی ٤ی ٢٠٢٠

PUKmedia