مەکتەبى سیاسى یەکێتى: لاوان هەمیشە پێشەنگ و داینەمۆی تێكۆشان بوون

PUKMEDIA

لۆگۆى یەکێتیى نیشتمانیى کوردستان و رێكخراوی ئازادیی لاوانی كوردستان

مەكتەبی سیاسی یەكێتیی نیشتمانیی كوردستان بە بۆنەى 27هەمین ساڵیادى دامەزراندنى رێکخراوى ئازادى لاوانى کوردستان پەیامێکى پیرۆزبایى ئاڕاستەى سەرجەم لاوانى كوردستان دەكات و رایدەگەیەنێت: لە كوردستاندا لاوان هەمیشە پێشەنگ و داینەمۆی تێكۆشان بوون، لە دامەزراندنی یەكێتیی نیشتمانیی كوردستان و دەستپێكردنی شۆڕشی نوێشدا سەرقافڵەی ئەم كاروانە بوون.

دەقى پەیامەکە:

لە یادی دامەزراندنی رێكخراوی ئازادیی لاوانی كوردستاندا

پیرۆزباییەكی گەرم لەسەرجەم لاوانى كوردستان دەكەین و ئومێدی بەدیهاتنی هیوا و ئاواتەكانیان بۆ دەخوازین

لە كوردستاندا لاوان هەمیشە پێشەنگ و داینەمۆی تێكۆشان بوون ، لە دامەزراندنی یەكێتیی نیشتمانیی كوردستان و دەستپێكردنی شۆرشی نوێشدا سەرقافڵەی ئەم كاروانە بوون ، لە مێژووی شۆرش و بەرەنگاریدا لە پێناو بەدیهاتنی داواكانی گەلەكەماندا لاوان لەڕیزی پێشەوەی گیانفیدایدا بوون .

هەرچەندە لەناو كایەی سیاسی و حوكمڕانیدا یەكێتی هەمیشە بواری بۆ رۆڵ و بەشداری لاوان رەخساندوە ، ئەمڕۆ و لەم یادەدا جارێكی تر پشتیوانی خۆمان بۆ كاراكردنەوەی زیاتری كارەكانتان دووپاتدەكەینەوە كە بە پێی گۆرانكاریەكان و هاتنە پێشەوەی هەلومەرجی نوێ رێكخراوی ئازادیی لاوان بە گوڕ و تینی نوێوە گەشە بە خۆی بدات لە پێناوی وەدیهاتنی ئومێد و خەونەكانی گشت لاوانی كوردستان.

سڵاو بۆ رۆحی پاكی ئەو لاوانەی بۆ رزگاری و ئازادی كوردستان گیانیان بەخشی.

مەكتەبی سیاسی
یەكێتیی نیشتمانیی كوردستان

PUKMEDIA