دەرباز کۆسرەت رەسوڵ و کونسوڵی چین: دیالۆگ چارەسەری کێشەکان دەکات

نوسینگەى راگەیاندنى دەرباز کۆسرەت رەسوڵ

وێنەیەکى کۆبوونەوەکە

ئەمڕۆ پێنجشەممە دەرباز کۆسرەت رەسوڵ و کونسوڵی کۆماری میللیی چین لە هەولێر جەختیان لەسەر گرنگیی دیالۆگی ستراتیژیی دوورمەودا بۆ چارەسەرکردنی کێشە نێودەوڵەتییەکان و بەهێزکردنی سەقامگیریی ناوچەیی کردەوە.

ئەم هەڵوێستە لە میانی دیدارێکی رەسمیدا هات کە لە بارەگای مەکتەبی سیاسیی یەکێتیی نیشتمانیی کوردستان لە شاری هەولێر بەڕێوەچوو، کە تێیدا دەرباز کۆسرەت رەسوڵ ئەندامی مەکتەبی سیاسیی یەکێتی پێشوازی لە لیو جیون، کۆنسوڵی گشتیی چین لە هەرێمی کوردستان و جێگرەکەی ژانگ جیانشین کرد، کە بە مەبەستی تاوتوێکردنی دوایین پێشهاتە سیاسییەکانی عیراق و ناوچەکە کۆبوونەوە.

تەوەرێکی سەرەکیی گفتوگۆکان تەرخانکرابوو بۆ تاوتوێکردنی دەرەنجامەکانی لووتکەی ئەم دواییەی پەکین، کە لە نێوان سەرۆکی چین شی جینپینگ و سەرۆکی ئەمریکا دۆناڵد ترەمپ بەڕێوەچوو، لایەنی چینی ئاماژەی بە پابەندبوونی بەردەوامی پەکین کردووە بۆ بەکارهێنانی دیپلۆماسی وەک کەرەستەی سەرەکیی یەکلاکردنەوەی قەیرانە گەورەکان لەسەر ئاستی جیهان.

لە بەشێکی دیکەی کۆبوونەوەکەدا، هەردوولا پێگەی بڕیاری 2758ی نەتەوەیەکگرتووەکانیان بەرز نرخاند، کە وەک بنەمایەکی یاسایی و نێودەوڵەتی بۆ چەسپاندنی پرەنسیپەکانی سەروەری و سەقامگیریی نێودەوڵەتی سەیر دەکرێت و لایەنەکان هاوڕابوون کە لێکتێگەیشتنی هاوبەش لەسەر یاسا نێودەوڵەتییەکان، بناغەی پێوەندییەکانی پەکینە لەگەڵ جیهانی دەرەوەدا.

هەروەها هەردوولا جەختیان لە پەیوەندی دێرینی نێوان حزبی شیوعی چین و یەکێتیی نیشتمانیی کوردستان کردەوە، کە لەدێر زەمانەوە بناغەیەکی پتەوی هەیە و زیاتر پەرەی پێ دەدەن.

PUKMEDIA