نزار ئامێدى: دەبێت کەرکوک وەک مۆدێلی پێکەوەژیان و هاوبەشی بمێنێتەوە

نوسینگەى راگەیاندنى سەرۆک کۆمار

نزار ئامێدی سەرۆک کۆماری عیراق و محەممەد سەمعان کەنعان پارێزگاری کەرکوک

نزار ئامێدی، سەرۆک کۆماری عیراق پێشوازیکرد لە محەممەد سەمعان کەنعان و فەرمانی دیاریکردنی بە پارێزگاری کەرکوک پێشکەشکرد و هیوای سەرکەوتنی بۆ خواست لە ئەرکە نوێکەیدا.

لە میانی دیدارەکەدا کە ئەمڕۆ دووشەممە 20ى4ى2026 لە کۆشکی بەغداد بەڕێوەچوو، سەرۆک کۆمار جەختیکردەوە لە گرنگی چڕکردنەوەی هەوڵەکان بۆ خزمەتکردنی دانیشتوانی پارێزگای کەرکوک و کارکردن بۆ چەسپاندنی سەقامگیری ئەمنی و کۆمەڵایەتی لە پارێزگاکەدا، هاوشان لەگەڵ ویستی هاووڵاتییان و بەدیهێنانی گەشەسەندنی بەردەوام، جەختیشیکردەوە لە پێویستی هاریکاری نێوان دەزگا ناوخۆیی و حکومییەکان بۆ پێشکەشکردنی باشترین خزمەتگوزاریی و باشترکردنی بارودۆخی ژیان.

سەرۆک کۆمار ئاماژەیكرد، بە دانانی پارێزگاری کەرکوک بەگوێرەی رێکارە دەستوورییەکان و هاوتەریب لەگەڵ ئەو لێکتێگەیشتنانەی کە سەقامگیریی پارێزگا و هاوسەنگیی پێکهاتە جیاکان مسۆگەر دەکەن، دووپاتیشی کردەوە کە دەبێت ئیدارەی کەرکوک وەک مۆدێلی پێکەوەژیان و هاوبەشی بمێنێتەوە کە بەبێ جیاوازی خزمەت بە هەموو دانیشتووانەکەی بکات.

لای خۆیەوە محەممەد سەمعان کەنعان سوپاس و پێزانینی خۆی ئاراستەی سەرۆک کۆمار کرد  بۆ ئەو متمانەیە، جەختیکردەوە  کە دڵسۆزانە و بەرپرسیارانە کار بکات بۆ خزمەتکردنی پارێزگای کەرکوک و دانیشتوانەکەی بەبێ جیاوازی، هەروەها بۆ خستنەگەڕی هەموو هەوڵەکانی بۆ هێنانەدی سەقامگیری و دابینکردنی پێداویستی هاووڵاتییان.

PUKMEDIA