سەرۆك كۆمار جەخت لەسەقامگیری عیراق دەكاتەوە

راگەیاندنی سەرۆککۆماری عیراق

نزار ئامێدی، سەرۆك كۆماری عیراق

ئەمڕۆ دووشەممە 20ی نیسان 2026، نزار ئامێدی، سەرۆك كۆماری عیراق لەكۆشكی بەغداد، پێشوازی لەوەفدێكی پەرلەمانتارانی رەوتی حیكمەی نیشتمانی و خالید بەتال، وەزیری پیشەسازی و كانزاكان، شێخ هومام حەمودی، سەرۆكی ئەنجومەنی باڵای ئیسلامی كردو تاوتوێی بارودۆخی گشتی عیراق و ناوچەكە و ئاڵنگارییەكانی بەردەم وڵات-یان كرد.

سەرۆك كۆمار پێشوازی لەوەفدێكی پەرلەمانتارانی رەوتی حیكمەی نیشتمانی دەكات

لەدیدارەكەدا، وەفدی پەرلەمانتارانی رەوتی حیكمەی نیشتمانی پیرۆزبایی خۆیان پێشكەش بەسەرۆك كۆمار كرد، بەبۆنەی هەڵبژاردنی بەسەرۆك كۆمار و هیوای سەركەوتنیان بۆ خواست لەجێبەجێكردنی بەرپرسیارێتییە نیشتمانییەكانیدا.

هاوكات بارودۆخی گشتی عیراق و ناوچەكە و ئاڵنگارییەكانی بەردەم وڵات تاوتوێ كرا، سەرۆك كۆمار جەختی لەگرنگی پاراستنی سەقامگیری و چەسپاندنی پڕۆسەی سیاسی كردەوە.

هەروەها باس لەڕۆڵی ئەنجومەنی نوێنەران و پاڵپشتیكردنی پڕۆسەی یاسادانان كرا، سەرۆك كۆمار دووپاتیكردەوە لەگرنگی دەركردنی یاساكانی تایبەت بەدەستەبەركردنی پێداویستییەكانی هاووڵاتیان و بەهێزكردنی هاوكاری نێوان پێگەكانی حكومەت بۆ بەشداریكردن لەبەدیهێنانی چاكسازی و گەشەپێدان.

لەلای خۆیانەوە پەرلەمانتارانی رەوتی حیكمە، ئامادەیی خۆیان بۆ كاركردن لەپێناوی بەرژەوەندی گشتی و سەقامگیری وڵات دووپاتكردەوە.

سەرۆك كۆمار پێشوازی لەوەزیری پیشەسازی دەكات

هەر ئەمڕۆ نزار ئامێدی، لەكۆشكی بەغداد، پێشوازی لە خالید بەتال، وەزیری پیشەسازی و كانزاكان كردو وەزیر پیرۆزبایی لەسەرۆك كۆمار كرد بەبۆنەی هەڵبژاردنی بەسەرۆك كۆمار و هیوای سەركەوتنی بەردەوامی بۆ خواست.

لەمیانی دیدارەكەدا سەرۆك كۆمار جەختی لەگرنگی پاڵپشتیكردنی كەرتی پیشەسازی و بەهێزكردنی رۆڵی لەپەرەپێدانی ئابووری عیراقدا كردەوە، هەروەها ئاماژەی بەپشتیوانی سەرۆكایەتی كۆمار كرد بۆ پلانەكانی وەزارەت لەپێشخستنی پیشەسازییە ناوخۆییەكان و هاندانی وەبەرهێنان و چارەسەركردنی ئەو ئاڵنگارییانەی كەڕوبەڕوی كارگە و كۆمپانیاكانی وڵات دەبنەوە، بەمەش بەشداری لەگەشەپێدانی بەردەوامدا دەكات.

لەلای خۆیەوە وەزیری پیشەسازی دیارترین پڕۆژە و پێشنیارەكانی ئێستای خستەڕوو كەئامانجیان زیادكردنی بەرهەمهێنان و باشتركردنی كوالێتی بەرهەمەكانی نیشتمانییە، بۆ دابینكردنی پێداویستییەكانی بازاڕی ناوخۆیی.

سەرۆك كۆمار پێشوازی لەسەرۆكی ئەنجومەنی باڵای ئیسلامی دەكات

هاوكات هەر ئەمڕۆ سەرۆك كۆمار پێشوازی لەشێخ هومام حەمودی، سەرۆكی ئەنجومەنی باڵای ئیسلامی و  وەفدی یاوەری كردو وەفدەكە پیرۆزبایی خۆیان پێشكەش بە نزار ئامێدی كرد بەبۆنەی هەڵبژاردنی بەسەرۆك كۆمارو هیوای سەركەوتنی بەردەوامیان بۆ خواست لە ئەركەكانیدا.

لەدیدارەكەدا پێشهاتەكانی بارودۆخی گشتی، لەهەردوو ئاستی ناوخۆیی و ناوچەیی و ئاڵنگارییەكانی خرانە بەر باس و جەختیشی لە گرنگی چڕكردنەوەی پەیوەندی و دیالۆگ لەنێوان هێزە سیاسییەكاندا بۆ گەیشتن بەڕێككەوتن لەسەر پرسە سەرەكییەكانی پەیوەست بەبەڕێوەبردنی دەستەڵات كرایەوە لەپێناوی بەرژەوەندی نیشتمانیدا، بەجۆرێك كە هاوكاربێت لەچەسپاندنی سەقامگیری سیاسی لەوڵاتدا.


PUKMEDIA