سەرۆکوەزیرانی بەریتانیا: بەشداری لە جەنگی ئێراندا ناکەین

میدیاکان

کییەر ستارمەر سەرۆکوەزیرانی بەریتانیا

سەرۆکوەزیرانی بەریتانیا دووپاتی دەکاتەوە کە وڵاتەکەی بەشداری لە جەنگی دژی ئێران ناکات، چونکە بەرژەوەندی وڵاتەکەی لە تێوەگلان لەو جەنگەدا نییە.

کییەر ستارمەر سەرۆکوەزیرانی بەریتانیا، بە میدیاکانی وڵاتەکەی راگەیاند:وڵاتەکەی بەشێوەیەکی راستەوخۆ بەشداری لە جەنگ دژی ئێراندا ناکات و زیانی بۆ بەرژوەندییەکانمان هەیە.

سەرۆکوەزیرانی بەریتانیا دووپاتیشی کردەوە: وڵاتەکەی بەشداری لە بەرپەرچدانەوەى درۆنەکانی ئێران دەکات، لە پێناو پاراستنی هاوپەیمانەکان و بەرژەوەندییەکانی وڵاتەکەی.

هاوکات، کییەر ستارمەر دانی بەوەدا ناوە، کە ئەمریکا بنکە سەربازییەکانی لە جەنگەکەدا بەکاردەهێنێت.

لە کۆتایشدا، کییەر ستارمەر سەرۆکوەزیرانی بەریتانیا،رایگەیاند: وڵاتەکەی بە نیگەرانییەکی زۆرەوە چاودێری پەرەسەندنە سەربازییە خێراکانی ڕۆژهەڵاتی ناوەڕاست دەکات.

ئەمەش لەکاتێکدایە، بەهۆی جەنگی ئێرانەوە، پەیوەندییەکانی ئەمریکا لەگەڵ وڵاتانی ئەوروپا و بەریتانیا گرژی تێکەوتووە و سەرۆکی ئەمریکاش وڵاتانی ئەوروپا و ناتۆی بە پڵنگی سەر کاغەز ناوبرد، هەروەها راشیگەیاند: سەرۆکوەزیرانی ئێستای بەریتانیا وەک ویسنتۆن چەرچڵ مەزن نییە.

PUKMEDIA