وەزارەتی دارایی: چاوەڕێ دەکەین سبەینێ دەست بەدابەشکردنی مووچە بکەین

PUKMEDIA

ناردنی تەمویلی مووچە

ئەمڕۆ 8ی3ی2026، گوژمەیەکی دیکە، بە بڕی زیاتر لە 365 ملیار دینار، خرایە سەر هەژماری بانکی وەزارەتی دارایی و ئابوری هەرێمی کوردستان، وەزارەتی دارایش رایدەگەیەنێت: چاوەڕێدەکەین سبەینێ تەواوی تەمویلی مووچە بگات و راستەوخۆ دەست بەدابەشکردنی مووچەی مانگی شوبات بکەین.

وەزارەتی دارایی و ئابوری هەرێمی کوردستان، لە راگەیەندراوێکیدا ئاماژەی بەوەکردووە: دوانیوەڕۆی ڕۆژی یەک شەممە ( 8 ی ئازاری 2026 ) گوژمەیەکی تر بەبڕی (365 ) ملیارو ( 702 ) ملیۆن دینار وەک بەشێکی تر لەتەمویلی مووچەی مانگی شوباتی فەرمانبەرانی هەرێمی کوردستان، خرایە سەر هەژماری بانکی وەزارەتی دارایی و ئابوری هەرێمی کوردستان لە لقی هەولێری بانکی ناوەندی عیراق.

 لە بارەی دابەشکردنی مووچەی مانگی شوباتیش، وەزارەتی دارایی ئاشکرای کردووە: چاوەڕێ دەکەین سبەینێ دووشەممە، لەگەڵ گەیشتنی تەواوی تەمویلی مووچە لەلایەن وەزارەتی دارایی عیراقەوە ڕاستەوخۆ دەست بەدابەشکردنی مووچەی مانگی شوبات بکەین.

ئەمەش لەکاتێکدایە،ڕۆژی پێنج شەممە 5ی3ی2026، بڕی (274 ) ملیارو ( 962 ) ملیۆن دینار بە چوار گوژمە ،وەک بەشێک لە تەمویلی مووچەی مانگی شوباتی مووچەخۆرانی هەرێم ، کە بریتیە لە تەمویلی مووچەی مانگی شوباتی خانەنشینان و سودمەندانی چاودێری کۆمەڵایەتی و فەرمانبەرانی گرێبەست و مینحەی زیندانیانی سیاسی ، خرایە سەر هەژماری بانکی وەزارەتی دارایی و ئابوری هەرێمی کوردستان لە لقی هەولێری بانکی ناوەندی عیراق.

PUKMEDIA