دابەشكردنی مووچەی مانگی 1 لەعیراق دەستیپێكرد

PUKMEDIA

ديناری عیراقی

وەزارەتی دارایی عیراق، دەستی بەڕێكارەكانی تەمویلكردنی مووچەی مانگی 1ی فەرمانبەران و مووچەخۆران كردو داواش لەكارمەندەكانی دەكات رۆژانی پشوو دەوام بكەن. 

وەزارەتی دارایی عیراق رایگەیاند: رێكارەكانی وردبینی لەتۆماری مووچەی فەرمانبەرانی دەوڵەت دەستیپێكردووەو مووچە بەشێوەیەكی تەواوەتی مسۆگەرەو ستافی تایبەتمەند بەشێوەیەكی كردەیی دەستیان كردووە بە تەمویلكردنی سەرجەم یەكەكانی خەرجكردن. 

راشیگەیاندووە: وەزارەت بەمەبەستی پەلەكردن و رێگریكردن لەدروستبوونی هەر كەلێنێكی زەمەنی، فەرمانیداوە رۆژانی هەینی و شەممەی ئەم هەفتەیە دەوامی رەسمی هەبێت بۆ ئەو فەرمانبەرانەی كە تایبەتمەندن بە كاروباری مووچەوە. 

هاوكات هۆشداریش دەدات، یەكەكانی خەرجكردن تۆماری تەواوەتی خۆیان بنێرن بەمەبەستی ئاسانكاریكردن بۆ پڕۆسەی خەرجكردنی موچەو مەرجی داناوە دەبێت تۆمارە ئەلیكترۆنییەكانیان هاوتابێت لەتۆمارە كاغەزییەكان، ئەمەش لەچوارچێوەی بڕیاری ئەنجومەنی وەزیراندایە بەمەبەستی هەژماركردنی خانەنشینی و ناردنی بۆ سندوقی خانەنشینی و لێبڕینی باج وەكو داهاتی كۆتایی بۆ گەنجینەی گشتی دەوڵەت.

وەزارەتی دارایی ئاماژەی بەوەشكردووە، تاوەكو لیستی تەواوەتی مووچەی لەلایەن دامودەزگاكانەوە پێنەگات، مووچە نانێرێت.


PUKMEDIA