لە سلێمانی هەڵبژاردن بۆ دەستەی بەڕێوەبردنی چوار یانەی وەرزشی بەڕێوەچوو

PUKMEDIA

پرۆسەی هەڵبژاردنی چوار یانەی وەرزشی لە سلێمانی

بە سەرپەرشتی بەڕێوەبەرایەتی گشتی وەرزش، هەڵبژاردن بۆ هەر چوار یانەی وەرزشی ( ئەفرۆدێت و ئەسپسواری گاردینا و سەرچنار و فرۆکەوانی سلێمانی ) بەڕێوەچوو.

لەم هەڵبژاردنەدا، هاوڕێ رواندزی وەک سەرپەرشتیار و جێگری بەڕێوەبەری گشتیی وەرزش و د . ئەژی خەلیل وەک سەرۆکی لێژنە و هەریەک لە کاروان زیرەک بەڕێوەبەری وەرزشی سلێمانی و سەلاحەددین محمود و هۆشەنگ عەبدوڵڵا و عوسمان عومەر و محمود عەبدولرەحمان وەک ئەندامی لێژنە بەشداربوون.

هاوڕێ رواندزی سەرپەرشتیار و جێگری بەڕێوەبەری گشتیی وەرزش، لە ووتەیەکدا رایگەیاند: بەپێی یاسا و ڕێنماییەکان هەڵبژاردن بۆ گشت یانەکان ئەنجام دەدەین، وەرزش یەکێکە لە سێکتەرە هەر گرنگەکان، بە وەرزش دەتوانین ناو و ئاڵای پیرۆزی کوردستان، لەسەر ستەیج و سەکۆ و گۆرەپانە جیهانیەکان بە بەرز و بڵندی رابگرین، بۆیە پێویستە گشت یانە وەرزشییەکان لە هەرێمی کوردستان، گرنگی بە سەرجەم یارییە بە تاک و کۆمەڵەکان بدەن.

جێگری بەڕێوەبەری گشتیی وەرزش، جگە لە پیرۆزبایی ئەنجامدانی هەڵبژاردن، ئەوەشی راگەیاند ئەوەی لە توانایی ئێمە دابێت بۆ هاوکاری ئێوە و پێشخستنی وەرزش لە کوردستان بە هیچ شێوەیەک درێخی ناکەین.

د. ئەژی خەلیل سەرۆکی لێژنەی هەڵبژاردن لە ووتەکانیدا، تیشکی خستەسەر گرنگی هەڵبژاردن و ئاماژەی بەوەکرد: پێویستە ئەو دەستە کارگێرییە نوێیەی متمانەی دەستەی گشتیی وەردەگرن، بە هەموو توانایەک هەوڵ بۆ باشترکردنی لایەنی ئیداری و دارایی و وەرزشی یانەکەیان بدەن، هەروەها بۆ ئەوەی داهاتووی یانەکەشیان سەرکەوتووبێت، دەبێت خاوەن ژێرخانی تایبەتی خۆیان بن.

کاروان زیرەک بەڕێوەبەری وەرزشی سلێمانی لە ووتەکانیدا، پاڵپشتی و پشتیوانی بەڕێوەبەرایەتی وەرزشی سلێمانی بۆ یانەکان دووپاتکردەوە و رایگەیاند ئەوەی لە توانایی ئێمە دابێت بۆ خزمەتکردنی وەرزشی پارێزگای سلێمانی درێخی ناکەین.

سەلاحەددین محمود بەڕێوەبەری یانەکانیش، بە وردی باسی لە  ڕێنمایی و شێواز و میکانز و چۆنیەتی دەنگدان کرد.

لەكۆتایی بەرێوەچوونی هەڵبژاردنی هەر چوار یانەكەدا، هاورێ رواندزی جێگری بەرێوەبەری گشتی وەرزشی كوردستان و سەرپەرشتیاری هەڵبژاردنی یانەكانی كوردستان رایگەیاند: پرۆسەی بەرێوەچونی هەڵبژاردنی یانەكان بەردەوامی دەبێت و وتیشی بەناوی  بەڕێوەبەرایەتی گشتیی وەرزش، جوانترین و گەرمترین پیرۆزی ئاراستەی هەر چوار یانەی وەرزشی ( ئەفرۆدێت و ئەسپسواری گاردینا و سەرچنار و فرۆکەوانی سلێمانی ) دەکەین، هیوادارین داهاتویان پڕ دەستكەوتی وەرزشی بێت بەئاراستەی پێشخستنی زیاتری وەرزش لەكوردستان.

PUKMEDIA