ناردنی مووچە بۆ هەرێم بەردەوام دەبێت

PUKMEDIA

دراوی عیراقی

ناردنی مووچەی مانگی کانوونی دووەم و مانگەکانی دیکە لەلایەن عیراقەوە بۆ هەرێم بەردەوامی دەبێت و ئەندامێکی خولی پێشووی لیژنەی دارایی ئەنجومەنی نوێنەرانی عیراقیش دەڵێت: هەتا بودجە پەسند دەکرێت، رێککەوتنی نێوان هەرێم و بەغداد بەردەوامیی دەبێت.

شیروان میرزا ئەندامی خولی پێشووی لیژنەی دارایی لە ئەنجومەنی نوێنەرانی عیراق بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: ئەو رێککەوتنەی لەنێوان هەولێر و بەغداد هەیە لەبارەی مووچەی مووچەخۆرانی هەرێم بەردەوامیی دەبێت، تا ئەو کاتەی لەپەڕلەمانەوە بوودجە پەسند دەکرێت.

راشیگەیاند: پێویستە حکومەتی هەرێم بەردەوام بێت لەهەناردەکردنی نەوتی هەرێم لەڕێگەی کۆمپانیای سۆمۆوە، هەروەها مانگانە داهاتی نانەوتی بۆ عیراق بنێرێت، لەبەرامبەریشدا حکومەتی عیراق پابەند دەکرێت بە ناردنی مووچەی مووچەخۆرانی هەرێم.

شیروان میرزا ئاماژەی بەوەشکرد، مووچەی مانگەکانی (1،2،3)ی ئەمساڵ بەپێی ئەو رێککەوتنی لەنێوان هەردوولادا هەیە لەلایەن عیراقەوە بۆ هەرێم دەنێردرێت و لەگەڵ دابەشکردنی مووچەی مووچەخۆرانی عیراق مووچەخۆرانی هەرێمیش مووچە وەردەگرن.

سەبارەت بە مووچەی مانگەکانی 11 و 12ی ساڵی رابردووش ئەو ئەندامەی ئەنجومەنی نوێنەرانی عیراق رایگەیاند: پێویستە هەردوو حکومەت ئەو پرسە یەکلابکەنەوە هەرچەندە بەپێی داتاو ئامارەکانی وەزارەتی دارایی هەرێم، بۆ سێ ساڵی رابردووی بودجە حکومەتی عیراق24.3  ترلیۆن دیناری کەمتری لەبودجە بۆ هەرێم ناردووە، بەڵام لەبەرامبەردا دارایی عیراق قسەی خۆی هەیە، بۆیە ئەو پرسە پێویستی بەیەکلاکردنەوەیە.

شیروان میرزا راشیگەیاند: لێکتێگەیشتنی باش لەنێوان هەرێم و عیراق لەسەر پرسی مووچە و بوودجە هەیە و چاوەڕواندەکرێت لەگەڵ پەسندکردنی بودجە کێشەکانی نێوانیان کاڵتر ببنەوە و کێشەی ناردن و نەناردنی مووچە بەپێی بودجە چارەسەر بکرێت، چونکە هەرێم پابەندە بەهەناردەکردنی نەوتەکەی لەڕێگەی سۆمۆوە کە ئەوە یەکێکە لەخاڵە گرنگەکانی نێوان هەردوولا.

ئەمەش لەکاتێکدایە، رۆژی 28ی12ی2025 بڕی نۆ سەدو چل و دوو ملیارو هەشت سەدو چل و پێنج ملیۆن دینار وەک تەمویلی مووچەی مانگی تشرینی یەکەمی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووری هەرێمی کوردستان و رۆژی 29ی12ی2025 بە سێ رۆژ دەست بەدابەشکردنی مووچەی مانگی تشرینی یەکەمی فەرمانبەران و مووچەخۆرانی هەرێمی کوردستان کرا و چارەنووسی مووچەی مانگەکانی 11 و 12ی ساڵی 2025یش نادیارە.

PUKMEDIA