لەساڵی نوێدا بەغداد هیچ بەشەخۆراکێکی بۆ هەرێم نەناردووە

PUKMEDIA

بەشەخۆراکی مانگانە

کێشەی دارایی دەکەوێتە نێوان وەزارەتی بازرگانی و پیشەسازی حکومەتی هەرێمی کوردستان و وەزارەتی بازرگانی عیراق و لەساڵی نوێدا هیچ بەشەخۆراکێک بۆ هەرێم نەنێردراوە، بەڕێوەبەری خۆراکی سلێمانی-ش دەڵێت: لەهەوڵداین بەزووترین کات کێشەکە چارەسەربکرێت.

کامەران فەتاح بەڕێوەبەری خۆراکی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: بەهۆی کێشەی داراییەوە لەساڵی نوێدا هیچ بەشەخۆراکێک لەلایەن بەغدادەوە بۆ هەرێمی کوردستان نەنێردراوە، لەوچوارچێوەیەشدا نوسراوی رەسمیی ئاڕاستەی بەغداد کراوە و لەهەوڵی چارەسەرکردنی کێشەکەداین.

بەپێی زانیارییەکانی PUKMEDIA بەهۆی ئەوەی هەرێم پارەی بەشەخۆراکی هاووڵاتیانی لەساڵی 2003وە تا ساڵی 2022 بۆ بەغداد نەناردووە، کە بڕەکەی زیاتر لە 117 ملیار دینارە، بەغداد بەشەخۆراکی هەرێمی راگرتووە.

 هاوکات کامەران فەتاح راشیگەیاند: هەوڵەکانی هەردوو وەزارەتی پەیوەندیدار بەردەوامن بۆ چارەسەرکردنی کێشەکە و چاوەڕواندەکرێت لەچەند رۆژی داهاتوودا ئەو کێشەیە چارەسەربکرێت و بەغداد دەست بە ناردنی بەشەخۆراکی مانگانەی هاووڵاتیان بکاتەوە.

بەشەخۆراکی مانگانەی هاووڵاتیان کە خۆی لە (ئارد، برنج، زەیت، نیسک، فاسۆلیا، نۆک، لەتکە نۆک، دۆشاو، شەکر) دەبینێتەوە، مانگانە بەسەر هاووڵاتیاندا دابەشدەکرێت، بەڵام بە تێکڕای ساڵەکە چەند مانگێک دابەشناکرێت و ئەمەش کاریگەری لەسەر جێگیرکردنی نرخی خۆراک لەبازاڕەکاندا هەیە و بەدابەشنەکردنی بەشەخۆراک نرخەکان لەبازاڕدا بەرز دەبنەوە.

PUKMEDIA