عیراق بە فڕۆکەی بێفڕۆکەوان و کامێرای چاودێری بۆرییە نەوتەکان دەپارێزێت

میدیا عیراقییەکان

بۆری گواستنەوەی نەوت

بەڕێوەبەرایەتیی پۆلیسی وزە لە وەزارەتی ناوخۆی عیراق، لەسەرجەم پارێزگاکان کۆنترۆڵی تەواوی بۆرییەکانی گواستنەوەی نەوتی  کردووە، تەنانەت لەو ناوچانەشی کە پێشتر ببونە شوێنی بەقاچاخبردنی نەوت، بۆ ئەمەش پشتی بە چەندین تەکنەلۆژیای پێشکەوتوو بەستووە.

لە یەکەم هەوڵی پاراستنی سامانی نیشتمانیی، لە ئۆپراسیۆنێکی سەربازیدا توانرا زیاتر لە 27 ملیۆن لیتر لە پێکهاتەکانی نەوت بۆ حکومەت بگەڕێندرێتەوە، ئەمە جگە لەوەی دەیان کەس دەستگیر کراون و 58 مۆڵگەش بۆ کڕینی نەوت لە بازاڕی رەشدا لەناو بران.

هاوکات،عیراق بۆ پاراستنی بۆرییە نەوتەکان پشتی بە تەکنەلۆژیای سەردەم بەستووە و 49 فڕۆکەی بێفڕۆکەوانی بۆ چاودێری رۆژانە و ناردنی زانیارییەکان بۆ سەنتەری فەرماندەیی بەغداد دابین کردووە.

لەلایەکی دیکەوە، عیراق لە داهاتوودا سیستمی لێزەری هەستیاری بەدرێژایی بۆرییەکان جێگیر دەکات، کە سیستمەکە لە کاتی هەوڵی دزین یان زیانگەیاندن بە بۆرییەکان، ئاماژەی پێشوەختە دەنێرێت، ئامانجیش لەم کارە بۆ ئەوەیە پارێزگاری لە سامانی نیشتمانیی وڵات بکرێت.

عیراق رووبەڕووبونەوەکانی فراوانکردووە و، لە رابردوودا بۆ پاراستنی بۆرییە نەوتییەکان رووبەڕووی گروپەکان دەبووەوە، کە بۆ پاڵپشتی تیرۆرستان بۆریە ستراتیژییەکانیان بە ئامانج دەگرت، بەڵام ئێستا حکومەت رووبەڕووی ئەو کەسانەش دەبێتەوە کە بە شێوەیەکی نایاسایی دەیانەوێت بەرهەمە نەوتیەکان بگوازنەوە.

PUKMEDIA