سه‌رچاوه‌یه‌ك: پێش پشووه‌كانی سه‌ری ساڵ عیراق مووچه‌ بۆ هه‌رێم ده‌نێرێت

PUKMEDIA

دینارى عیراقى

پێش پشووه‌كانی سه‌ری ساڵی نوێی زاینی، وه‌زاره‌تی دارایی عیراق مووچه‌ی مانگی 10ی مووچه‌خۆرانی هه‌رێم ده‌نێرێت، ئه‌مه‌ش له‌كاتێكدایه‌ كه‌ وه‌زاره‌تی دارایی هه‌رێم لیستی سێ مووچه‌ی بۆ عیراق ناردوه‌، كه‌ لیستی مووچه‌ی مانگه‌كانی 10 و 11 و 12 یه‌، به‌ڵام پێش سه‌ری ساڵ ته‌نها یه‌ك مووچه‌ بۆ مووچه‌خۆرانی هه‌رێم ده‌نێدرێت.

دوێنێ سێشه‌ممه‌ 16ی12ی2025 وه‌زاره‌تی دارایی حكومه‌تی هه‌رێمی كوردستان لیستی مووچه‌ی مانگی 12 راده‌ستی وه‌زاره‌تی دارایی حكومه‌تی فیدراڵ كرد و به‌مه‌ش لیستی سێ مووچه‌ ئاڕاسته‌ی وه‌زاره‌تی دارایی عیراق كردوه‌، له‌كاتێكدا بڕیاره‌ یه‌ك مووچه‌ له‌ئه‌مساڵدا بدرێت به‌مووچه‌خۆرانی هه‌رێم و چاره‌نوسی دوو مووچه‌كه‌ی دیكه‌ به‌نادیاریی ماوه‌ته‌وه‌.

سه‌رچاوه‌یه‌ك تایبه‌ت له‌ وه‌زاره‌تی دارایی عیراق به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: له‌گه‌ڵ دابه‌شكردنی مووچه‌ی مانگی 12ی مووچه‌خۆرانی عیراقدا، مووچه‌ی مانگی 10 ی مووچه‌خۆرانی هه‌رێم ده‌نێردرێت و هیچ كێشه‌یه‌ك بۆ ناردنی مووچه‌ی مانگی 10 نییه‌.

به‌پێی زانیارییه‌كانی سه‌رچاوه‌كه‌، پێش پشووه‌كانی سه‌ری ساڵی زاینی مووچه‌ی مانگی 10ی مووچه‌خۆرانی هه‌رێم ده‌نێردرێت، به‌ڵام هیچ زانیارییه‌ك له‌به‌ر ده‌ست نییه‌ بۆ مووچه‌ی مانگه‌كانی 11 و 12ی مووچه‌خۆرانی هه‌رێم.

وه‌زاره‌تی دارایی هه‌رێم له‌ راگه‌یه‌ندراوێكدا ئاماژه‌ بۆ ئه‌وه‌ده‌كات: بڕیاره‌ ئه‌مڕۆ چوارشه‌ممه‌ له‌لایه‌ن تیمی ته‌كنیكی وه‌زاره‌تی دارایی و ئابووری هه‌رێمی كوردستانه‌وه‌ لیستی مووچه‌ی مانگی 12 راده‌ستی فه‌رمانگه‌ی ژمێریاری وه‌زاره‌تی دارایی حكومه‌تی فیدراڵ بكرێت.

هه‌رچه‌نده‌ حكومه‌تی هه‌رێمی كوردستان ته‌ئكید له‌ناردنی مووچه‌ی ته‌واوی مووچه‌خۆرانی هه‌رێمی كوردستانی له‌ وه‌زاره‌تی دارایی عیراق ده‌كاته‌وه‌، به‌ڵام ئه‌وه‌ی روونه‌ ته‌نها ناردنی مووچه‌ی مانگی 10 مووچه‌خۆرانه‌ و مووچه‌ی مانگه‌كانی 11 و 12 تائێستا به‌نادیاریی ماوه‌ته‌وه‌.

PUKMEDIA