قوباد تاڵەبانی: سلێمانی پایتەختی رۆشنبیری و کارسازییە

PUKMEDIA

قوباد تاڵەبانی جێگری سەرۆکوەزیرانی هەرێمی کوردستان

 ئەمرۆ 9ی12ی2025، لە سلێمانی کۆڕبەندی وەبەرهێنان بەڕێوەدەچێت و جێگری سەرۆکوەزیرانی هەرێمی کوردستانیش دووپاتی دەکاتەوە، کە سلێمانی بووەتە پایتەختی کارسازی و وەبەرهێنان لە عیراق و راشیدەگەیەنێت هەنگاو بۆ ئابورییەکی بەهێز دەنێین.

 سلێمانی بەرەو ئابورییەکی بەهێز هەنگاو دەنێت

قوباد تاڵەبانی جێگری سەرۆکوەزیرانی هەرێمی کوردستان لە کۆڕبەندەکە وتارێکی پێشکەشکرد و رایگەیاند: لە ساڵانی رابردوودا چەندین کاری جوان لە سلێمانی کراوە،بەڵام زۆر جار لە بەر ململانیێیە سیاسی و داراییەکان لە بیرمان دەچێت کە کۆمەڵێک سەرمایەداری بوێر و نیشتمانپەروەر زاڵ دەبن بەسەر ئاڵنگارییەکان کە داینەمۆی کوردستانن، وتیشی: سلێمانی دەمێکە بە پایتەختی رۆشنبیری ناسراوە ئێستاش هەنگاو دەنێت بەرەو ئابورییەکی بەهێز.


 جێگری سەرۆکوەزیرانی هەرێمی کوردستان دووپاتیشی کردەوە: سلێمانی بە پشتیوانی کەرتی تایبەت پێشکەوتنی زۆری بەخۆیەوە بینیوە، خاوەنی ناوەندەکانی فێرکردن و توێژینەوەیە،کە بووەتە هۆی گەشەکردنی سلێمانی و بەشێکی گرنگ و کاران لە دەستنیشانکردن و چارەسەرکردنی کێشەکان.

قوباد تاڵەبانی ئاماژەی بەوەشکرد: لە سلێمانی خاوەنی بەهێزترین کەرتی تەندروستی و پۆلیسین،هاوکات ژنانیش توانیویانە لە کەرتەکان هەنگاوی باش بنێن ، ئێمەش هەمیشە بەردەوام دەبین لە هاوکاریکردنی ژنان.

ئابوری هەمەجۆر دەکرێت و رۆتینات کەمدەکرێتەوە

 لەبارەی هەمەجۆرکردنی ئابورییش، جێگری سەرۆکوەزیرانی هەرێمی کوردستان رایگەیاند: چەندین دەیەیە سلێمانی سەقامگیرترین شاری عیراق و کوردستانە، کە کەشێکی ئارامی بۆ وەبەرهێنان دروستکردووە،هەروەها ئێمەش کار بۆ ئابورییەکی هەمەجۆر دەکەین، کە پشت بە تەکنەلۆژیا ببەستێت و لە پێناو ئەمەشدا کار بۆ بەدیجیتاڵکردنی حکومەت و کار بۆ کەمکردنەوەی رۆتیان دەکەین، ئەمە جگە لەوەی و بەردەوامین لە باشترکردنی شەفافیەت، بۆ ئەوەی بتوانین لە هەموو کەرتەکان گەشەی زیاتر بەخۆمانەوە ببینین.

 قوباد تاڵەبانی میکانیزمێکی نوێی حکومەتی ئاشکرا کرد بەوەی گرنگی زیاتر بە قەزاو ناحییەکان دەدەن و لە بارەیەوە رایگەیاند:
 گرنگییەکی زیاترمان داوە ، بۆ ئەوەی بەشێک لە کەرتە گرنگەکان لە شارەکانەوە بۆ قەزا و ناحییەکان بگوازینەوە، بۆ ئەوەی دەرفەتەکان بگوازرێنەوە بۆ قەزاو ناحییەکان، بەتایبەت لە کەرتی گەشتوکاڵ، هەروەها پیشەسازی خۆراک و پیشەسازیش بگوازرێنەوە، کە سودێکی هەمەجۆری هەیە.

لەگەڵ IFC  بە هاوبەشی کارەکان ئەنجام دەدرێت

 لە کۆتایشدا، قوباد تاڵەبانی جێگری سەرۆکوەزیرانی هەرێمی کوردستان داوای لە IFC  کرد کە بۆ پێشخستنی کەرتەکان هاوکار و پشتیوان بێت، لەو بارەیەوە رایگەیاند: ئەمڕۆ دەست بۆ IFC و دۆستەکانمان درێژ دەکەین، بۆ ئەوەی هاوکارمان بن لە دیزاین و پارەدارکردن، بۆ ئەوەی پێکەوە و بەهاوبەشی کارەکانمان لە تەواوی کەرتەکان خێراتر بکەین، هەروەها منیش وەک حکومەت هاوکار و پاڵپشتان دەبم ، بۆ ئەوەی لە بەرژەوەندی ئێوە و حکومەت و خەڵکی کوردستان کار بۆ خزمەتکردنی خەڵکی کوردستان بکەین، کە هەموومان لەسەر ئەو خاڵە کۆکین.


PUKMEDIA