قوباد تاڵەبانی: رێكخراوی ئازادی لاوان هەڵگری خواستی گەنجان بێت

نووسینگەی راگەیاندنی قوباد تاڵەبانی

كۆبوونەوەی قوباد تاڵەبانی لەگەڵ لێپرسراوانی رێكخراوی ئازادی لاوان

قوباد تاڵەبانی، لێپرسراوی مەكتەبی سكرتارییەتی سەرۆك مام جەلال لەگەڵ لێپرسراوانی رێكخراوی ئازادی لاوان كۆبووەوە و پشتگیری خۆی بۆ رێكخراوەكە دووپات كردەوە.

لە كۆبوونەوەكەدا كە رۆژی پێنج شەممە (30/1/2025) لە هەولێر بە ئامادەبوونی سالار مەحمود بەڕێوەچوو و تیایدا بەرپرسانی رێكخراوەكە لە شار و شارۆچكە جیاوازەكانی هەرێمی كوردستان ئامادەی بوون، قوباد تاڵەبانی بە ئاماژەدان بە گۆڕانكارییەكان، داوای كرد رێكخراوی ئازادی لاوان خۆی لەگەڵ گۆڕانكارییەكان بگونجێنێت و لە هەر قۆناغێكدا هەڵگری خواست و داواكارییەكانی گەنجانی سەردەمەكە بێت.

لێپرسراوی مەكتەبی سكرتارییەتی سەرۆك مام جەلال جەختیشی كردەوە لەسەر گرنگیی كاری رێكخراوەیی لەناو گەنجاندا و رایگەیاند: "پێویستە رێكخراوی ئازادی لاوان بە پلان و پڕۆژەی نوێوە گەنجان و لاوانی كوردستان لە شارو شارۆچكە جیاوازەكان لە دەوری خۆی كۆبكاتەوە".

 وتیشی: "رێكخراوی ئازادی لاوان لە هەر شار و ناوچەیەك دەبێت ببێتە سەكۆیەك بۆ بەشداریكردنی گەنجان لە چارەسەركردنی كێشەكانی گەنجان و گەشەپێدانی دەڤەرەكە لە بوارە جیاوازەكاندا".

لە بەشێكی دیكەی كۆبوونەوەكەدا دوای گوێگرتن لە بۆچوون و داواكارییەكانی بەرپرسانی رێكخراوی ئازادی لاوان، قوباد تاڵەبانی پشتگیری خۆی بۆ رێكخراوەكە دووپات كردەوە.

PUKMEDIA