سەرۆکوەزیرانی عیراق لیژنەیەک بۆ کۆنترۆڵکردنی چەک پێکدەهێنرێت

واع

کۆبوونەوەی عەلی زەیدی لەگەڵ بزووتنەوەی عەسائیبی ئەهلی حەق و کەتائیبی ئیمام عەلی

عەلی زەیدی سەرۆکوەزیرانی عيراق، لێژنەیەکی هاوبەش بۆ کۆنترۆڵکردنی چەک لە دەستی دەوڵەتدا پێکدەهێنێت و لە ماوەی دوو رۆژی ئایندەشدا دەستبەکار دەبن.

بەپێی راگەیەندراوێکی نووسینگەی ڕاگەیاندنی سەرۆکوەزیرانی عیراق، ئەم بڕیارە دوای ئەوە هات کە عەلی فالح زەیدی، وەک فەرماندەی گشتیی هێزە چەکدارەکان، پێشوازی لە دوو وەفدی بزووتنەوەی عەسائیبی ئەهلی حەق و کەتائیبی ئیمام عەلی کرد، ئامانج لە بڕیارەکەش؛ بۆ جێبەجێکردنی ڕێکارەکانی جیاکردنەوەی هێزەکان لە حەشدی شەعبی و کۆنترۆڵکردنی چەکە لە دەستی دەوڵەتدا.

لە کۆبوونەوەکەدا، سەرۆکوەزیرانی عیراق، رایگەیاند: ئەمڕۆ وڵاتەکەمان بە قۆناغێکی گۆڕانکاری گرنگدا تێپەڕ دەبێت، بەهۆی ئەو سەقامگیرییە ئەمنییە بەدیهاتووە، کە بەهۆیەوە قۆناغی ئێستا بووەتە قۆناغی ئاوەدانکردنەوە و گەشەپێدانی هەمەلایەنەیە، بۆ ئەم مەبەستەش پێویستمان بە یەکخستنی هەوڵی هەموو لایەنەکان هەیە.

عەلی زەیدی، لە بەشێکی دیکەی قسەکانیدا ستایشی قوربانیانی هێزە چەکدارەکان و دەزگا ئەمنییەکانی کرد لە ڕووبەڕووبوونەوەی ئەو مەترسییانەی پێشتر هەڕەشەیان لە عیراق دەکرد.

 ئاماژەی بەوەش کرد کە حەشدی شەعبی یەکێک بووە لە فاکتەرە سەرەکییەکانی بەدیهێنانی سەقامگیری، لە ئێستاشدا هێزەکانیان کۆڵەکەیەکی بنەڕەتین لە پرۆسەی بونیادنانەوە لە پاڵ دامەزراوەکانی دیکەی دەوڵەتدا.

 لە کۆتایشدا، جەخت لە کارکردنی لیژنەکە کردەوە، لەگەڵ جیاکردنەوەی هێزەکان لە حەشدی شەعبی و  کۆنترۆڵکردنی چەک لە دەستی دەوڵەتدا.

ئەمەش لەکاتێکدایە، عەلی زەیدی سەرۆکوەزیرانی عیراق، داوا دەکات هەموو گروپەکان پەیوەندیەکانیان  بپچڕێنن و سەرلەنوێ پێکهاتەکانیان لەناو هێزە ئەمنییەکانی دەوڵەت یەکبخەنەوە، هەروەها میکانیزمی تایبەت دادەنرێت بۆ دۆسیەی تێکەڵکردن و پەیوەستبوونی ئەو گروپانە بە لایەنە ڕەسمیەکانەوە، پاشانیش سەرجەم چەکەکانی ئەم گروپانە ڕادەستی لیژنەی ناوەندی و لایەنە ئەمنییەکان دەکرێن.

PUKMEDIA