مه‌حمود عوسمان: دوای وردبینیی بژمێره‌كان پاداشته‌كانیان وه‌رده‌گرن

PUKMEDIA

مەحمود عوسمان سەرپەرشتیاری گشتی جێبەجێكاری سەرژمێری لەهەرێم

سەرجەم ئەو بژمێرانەی بەشداری پرۆسەی سەرژمێرییان کرد، لیستی پاداشتیان بۆ کراوە و رەوانەی بەغدا کراوە، سەرپەرشتیاری گشتی جێبەجێكاری سەرژمێری-ش لەهەرێم دەڵێت:" دوای وردبینی و گەڕانەوەی لیستەکە لەبەغدا بژمێرەکان پاداشتەکانیان وەردەگرن".

٢٠ هەزار بژمێر پرۆسەکەیان بەڕێوەبرد

مەحمود عوسمان سەرپەرشتیاری گشتی جێبەجێكاری سەرژمێری لەهەرێم بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند:"سەرجەم ئەو بژمێرانەی بەشداری پرۆسەی سەرژمێرییان کرد، لیستی پاداشتیان بۆ کراوە و رەوانەی بەغدا کراوە، دوای وردبینی و گەڕانەوەی لیستەکە لەبەغدا پاداشتەکانیان وەردەگرن". 

"پرۆسەی سەرژمێری گشتی لەعیراق و هەرێمی کوردستان بەسەرکەوتویی کۆتاییهات، کە نزیکەی ٢٠ هەزار بژمێر پرۆسەکەیان بەڕێوەبرد"، مەحمود عوسمان وایوت.

سەرپەرشتیاری جێبەجێكاری سەرژمێری: دەستخۆشی لە بژمێرەکان دەکەین

سەرپەرشتیاری گشتی جێبەجێكاری سەرژمێری لەهەرێم راشیگەیاند:"دەستخۆشی لەو بژمێرانە دەکەین کە لەگەڵمان بەشداربوون و هۆکاری سەرکەوتنی پرۆسەکە بوون، زۆر لەکارەکانیان رازی بووین و ئەم کارەش دەچێتە سەر سیڤییەکەیان و پاڵپشتی کاریان دەکات".

دوای نزیكەی 40 ساڵ، رۆژی 2024-11-20 پڕۆسەی سەرژمێری گشتی لەعیراق و هەرێمی كوردستان بە سێ قۆناغ دەستیپێكرد بۆ ئەو مەبەستەش قەدەغەی هاتووچۆ لەسەرجەم ناوچەكانی عیراق و هەرێم تا سەعات 12:00 شەوی 21 لەسەر 22ی11  راگەیەنراو هاووڵاتیان پابەندكران لەكاتی سەردانیكردنی بژمێرەكان بۆ ماڵەكانیان ئامادەییان هەبێت و وەڵامی پرسیارەكانیان بدەنەوە، سەعات 12 ی شەوی 14-12-2024یش بەسەرکەوتویی كۆتایی بەپڕۆسەكە هات.