ستران عەبدوڵڵا: مورافەعەكەی مام لە ئیدارەی دەوڵەت و دەستووردا رەنگیدایەوە

PUKMEDIA

مورافەعە مێژووییەكەی سەرۆك مام جەلال

لە یادی 19 ساڵەی مورافەعە مێژووییەكەی سەرۆك مام جەلال دا، سایتی رەسمی یەكێتیی نیشتمانیی كوردستان PUKMEDIA دیدارێكی ستران عەبدوڵڵا لێپرسراوی مەكتەبی راگەیاندن بڵاودەكاتەوە كە پێشتر لە كەناڵی ئاسمانی كوردسات لەگەلێدا سازكراوە و تێیدا بەوردی باس لە رەهەندە سیاسیی و مێژووویی و كوردستانێتی كەركوك و زۆر لایەنی دیكەی دەكات.

رۆژی 9-2-2004، سەرۆك مام جەلال مورافەعە مێژوویەكەی خۆی لەسەر كەركوك و سنووری كوردستانی جنوبی پێشكەشكرد، ئەم مورافەعەیە جگە لە دیوە مێژوویەكەی كە مێژوویەكی پوختی تێكۆشانی گەلەكەمان دژی داگیركاری و تەعریب دەگێڕێتەوە و بەڵگە مێژووییەكان دەخاتە خزمەت ئەو تێكۆشانەوە، هەروا بووە مایەی پاڵنانێكی سیاسی بۆ دانپیانانی دەستەبژێری سیاسی عیراق بە قەوارەی فیدراڵی كوردستان و یەكلایكردنەوەی جوگرافیاكەی بە نەخشەڕێیەكی دەستووریی، لە پێشدا بە پێی مادەی 58 لە قانونی ئیدارەی دەوڵەت لە ساڵی 2004 و سەردەمی پۆل بریمەر (حاكمی مەدەنی ئەمەریكا لە عیراق) وئینجاش بە گوێرەی ماددەی 140 لە دەستوری دایمی عیراق لە ساڵی 2005.

ساڵانە ناوەندەكانی راگەیاندنی كوردستانی بە تایبەتی راگەیاندنی یەكێتیی نیشتمانیی كوردستان یادی ئەم راوەستانە مێژوویە دەكەنەوە، بەندەش وەك میدیاكار و پێشمەرگەیەكی بزووتنەوەی سیاسی كوردستان، لە قۆڵی یەكێتییەوە، لەسەر ئەمە قسەم هەبووە و وتارم نووسیوە. لە ناویاندا ئەم بەشدارییە فەقیرانەم لە سەكۆی كەناڵی كوردساتەوە. 

لەم بەشداریەدا كە رۆژی 9-2-2019 سازكراوە، دەرفەتم وەرگرت كە لە رەهەندێكی مێژووییەوە مانایەكی دیرۆكی بە تێكۆشانی مام جەلال لە دۆسێی كەركوك و دەستوری كوردستانی جنوبی بدەم.

مورافەعەكەی مام، تایتڵێك بۆ زیاتر لە 30 ساڵ خەبات

ئەو مورافەعەیەی سەرۆك مام جەلال لە رۆژی 9-2-2004 دا لە ئەنجومەنی حوكمی عیراقدا خستییەڕوو، تاكە مورافەعە نەبوو، بەتایبەیش لەسەر پرسی كەركوك، چونكە زۆربەی تەمەنی خەباتی سیاسی مام جەلال خەباتە لەپێناوی سەلماندنی كوردستانی بوونی كەركوك و ئەوە چەندەمین مورافەعە بوو، بەڵام جیاوازییەكەی ئەوەی ناو مەجلیسی حوكم لەگەڵ ئەوانی دیكەدا ئەوەیە كە ئەوە یەكەم مینبەرە كە لەدوای رووخانی رژێمی سەدام حسێن، ئەو رژێمەی كە لە ساڵی 1963 وە و دواتریش قۆناغی دووەمی گەڕانەوەی رژێمی بەعس بۆ سەر دەسەڵات لە ساڵی 1968، كە لە قۆناغی یەكەمی حوكمڕانییەوە لە 1963 وە دەستیكردووە بە پیادەكردنی سیاسەتی تەعریب لە شاری كەركوك، هەربۆیە مەسەلەی كەركوك لەژێر سایەی ئەو رژێمی بەعسەدا تەشەنەی سەندووە و تا ئەو كاتەش كە كۆبوونەوەكەی مەجلیسی حوكم كرا، بەبێ چارەسەر مایەوە، ئەوە یەكەمجار بوو كە مام جەلال مینبەری حكومڕانیی عیراقی دەكەوێتە دەست و ئەو مورافەعەیەی خۆی كە لە شاخەكانی كوردستانەوە، لە كۆڕ و كۆبوونەوە جیاجیاكانی كە كاری بۆ سەلماندی كوردستانی بوونی كەركوك دەكرد، توانی بیگوێزێتەوە بۆ ناو مەجلیسی حوكمی عیراق.

بە بەڵگە سەلماندی كەركوك كوردستانییە

ئەگەر دیققەت بدەن لەو كۆبوونەوەیەدا كە مام جەلال نەخشەكە دەكاتەوە، یەكێك لەو كەسانەی كە بەشدارە عەدنان پاچەچی-یە كە ئەندامی مەجلسی حوكمە لەو كاتەدا.  عەدنان پاچەچی ئەگەر خۆشی نەزانێت، باوكی كە ناوی موزاحیم پاچەچی بووە، لە سییەكان ‌و چلەكانی سەدەی رابردوودا دەیزانێت كە مەسەلەی كەركوك هێندەی مێژووی دەوڵەتی عیراق كۆنە، جگە لەوەش مورافەعەكەی مام جەلال بە تەنها لەسەر كوردستانیبوونی كەركوك نەبوو، بەڵكو لەسەر دیاریكردنی هەموو سنووری كوردستانی جنوبی بوو، چونكە كە سەلمانی كەركوك كوردستانییە، ئەوەشی سەلماند كە چیای حەمرین سنووری كوردستانی جنوبییە، ئەو عیراقە فیدرالًییەی كە سەرۆك مام جەلال لەو كاتەدا داوای دەكرد، دەبوو سنوورەكەی دیاری بكرێت، بۆیە بەو نەخشەیە ئەو سنوورە دیاری دەكات ‌و بەو سنوورەش كوردستانی بوونی كەركوك دیاری دەكات، وەك ئەوەی كە بەرگریی لێ دەكرد.

بێگومان مورافەعەمانی بەڕێز مام جەلال زۆر لەپێشترە لە مورافەعەكەی مەجلیسی حوكم، چونكە لە هەر كۆڕو كۆبوونەوەیەكدا جا حزبی بووبێت یان حكومی، یان جەماوەریی و لەهەر شوێنێكیش بووبێت، دەرفەتی بۆ هاتبێتە پێشەوە، مام جەلال ئەو مورافەعەیەی پێشكەش كردووە، بۆیە كە رۆژی مورافەعەكە هات، باكگراوندەكەی مام جەلال ئامادەبوو بۆ پێشكەش كردن ‌و بەدەستوربرد هێنانەوەی بەڵگە و دیكۆمێنتی پێویست بۆ ئەو پرسە تا بیخاتە بەردەم هەموو ئامادەبووان بەوانەشەوە كە نەیاری ماف ‌و خواستەكانی خەڵكی كوردستانن و توانی بۆ هەموویان عەرەب بە شیعە و سوننەوە، بۆ توركمان، بۆ نوێنەرانی هەموو پێكهاتەكانی روون بكاتەوە كە دەبێت كێشەی كەركوك بەو شێوەیە دەستنیشان بكرێت ‌و داهاتووی كەركوكیش بەم شێوەیە چارەسەر بكرێت، كەواتە دەتوانرێت بووترێت ئەو گفتوگۆیەی لەناو مەجلیسی حوكمدا كرا، مام جەلال زیاتر لە 30 ساڵ بووە خۆی بۆ ئامادە دەكرد، بەڵام ئەوەی لە رۆژی كۆبوونەوەكەی مەجلیسی حوكمدا روویدا، بە بەڵگە و وردەكارییەوە ئەوەی خستەڕوو كە ئەمانە بەڵگەی كوردستانێتیی كەركوكن.

بۆ بەڵگەی ئەو قسانەش چ لە تەلەفزیۆنی خاك یاخود كوردسات یان لە هەر كەناڵێكی دیكە كە بەرنامە كرابێت لەسەر مەسەلەی كوردستانبوونی كەركوك، مام جەلال قسەی تێدا كردووە و بەڵگە و دیكۆمێنتی مێژوویی لەو بارەیەوە خستۆتەڕوو.

پرۆڤەی پارێزەرێگ لە رێگەی راگەیاندنی یەكێتییەوە

لەو كاتانەی كە سەرۆك مام جەلال جگە لە مینبەری راگەیاندن هیچ مینبەرێكی دیكە نەبووە كە ئەو بەرگرییەی لێوە بكات، ئەوە هەمووی وەكو پرۆڤەی پارێزەرێك بووە بۆ ئامادەكردنی  لائیحەی دیفاع بۆ رۆژی دادگا و لەوێ كە شوێنی راستەقینە بووە، مورافەعە گەورەكەی كرد.

لەبیرمان نەچێت كە لە كۆڕ و كۆبوونەوە یان كۆنگرەكانی كۆمەڵەی رووناكبیریی كەركوكدا لە ساڵی 1997 كە لەسلێمانی بەسترا، هەڤاڵ مام جەلال زۆربەی ئەو بەڵگەنامانەی هێنایە ناو كۆبوونەوەكان ‌و بۆ ئامادەبووانی خوێندەوە كە جگە لە بەڵگەنامەكان، قسەی زۆربەی ئەو گەڕیدانەی تێدابوو كە هاتوونەتە كوردستان لە گەڕیدە ئینگلیزەكان، فەرەنسییەكان و عوسمانییەكان ‌و ئەوانی دیكە و هەمیشە مام جەلال ئەو بەڵگەنامە و نووسراوانەی پێبوو بۆ ئەو كۆبوونەوانەی لەگەڵ كەركوكییەكان دەیكرد، یان بۆ ئەو كۆبوونەوانەی كە تایبەت بوون بە كەركوك ‌و رەوشی ئەو شارە كە ئەو كتێب و بەڵگەنامانە كوردستانی بوونی كەركوك دەسەلمێنن، كە دواتر هەموویان لە دووتوێی كتێبێكدا بە هاندانی مام جەلال لەلایەن شێخ محەمەدی شاكەلییەوە كۆكرانەوە ‌و هەر مام جەلال-یش پێشەكیی بۆ نووسی.

دەتوانین ئەوە دووپات بكەینەوە كە ئەوەی لە مورافەعەكەی 9 ی شوباتی 2004 دا روویدا، بەری پرۆڤەی 30 ساڵ زیاتری خەباتی سەرۆك مام جەلال  بوو چ لە خەباتی شاخ لە شۆڕشی نوێدا ‌و چ لە گفتوگۆ و دانوستاندنەكاندا بۆ گەیاندنی ئەو راستییانە لەشێوەی مورافەعەیەكی دادگادا، كە هیوادارم ئەمە رۆژێك بێت ‌و هەمووی بنووسرێتەوە.

لە گفتوگۆی 1984دا بە بەعسییەكانی سەلماند 

جگە لەوەش یەكێك لە سەركەوتنەكانی یەكێتی لە گفتوگۆكانی ساڵی 1984 وروژاندن ‌و خستنەڕووی بەڵگەی تابیەت بە گۆڕینی دیمۆگرافی ‌و پێداگریی بوو لەسەر ئاساییكردنەوەی هەلومەرجی كەركوك ‌و ناوچە تەعریبكراوەكانی تر، ئەگەرچی حكومەتی عیراقی ئەوكات زۆر هەوڵیدابوو كە ئەو بەڵگەنامە ئیمزاكراوانەی وەربگرێتەوە، بەڵام وەفدی یەكێتی هەرزوو ناردبوویانەوە بۆ سەركردایەتی. بۆیە وەك لەسەرەتاوە ئاماژەمان پێدا، مورافەعەكە بەری زیاتر لە 30 ساڵ خەبات بوو، بەڵام تا ئەو كاتە عیراق دیموكراسیی تێدا نەبوو تا لە پێگەی شەراكەتی سیاسییەوە مام جەلال ئەوە بخاتەڕوو.

لایەنێی گرنگی ئەو مورافەعەیە ئەوەبوو كە بووە بناغەی چەسپاندنی سیستمی فیدرالی لەلایەك ‌و داواكردنی دیاریكردنی سنووری ئەوەی پێی دەوترێت كوردستانی جنوبی، كە ئەوەش بە دوو قۆتاغ لە یاسای كاتی بەڕێوەبردنی دەوڵەتی عیراق ‌و دواتریش لە دەستووری هەمیشەییدا جێگیركرا لە مادەكانی 58ی قانونی كاتی ئیدارەی دەوڵەتی عیراق ‌و مادەی 140ی دەستووردا كە بەبێ ناوهێنانی گێڕانەوەی كەركوك بۆسەر هەرێمی كوردستان، سنووری كوردستانی جنوبی لەناو ناوچە جێناكۆكەكاندا جێی دەكرێتەوە.

رەنگدانەوەی مورافەعەكە لە قانونی ئیدارەی دەوڵەت ‌و دەستووردا 

 ئەگەر بڕوانینە كاتەكە، رێك مانگێك دوای ئەو مورافەعەیە كە قانونی ئیدارەی دەوڵەت پەسەندكرا لەلایەن ئەنجومەنی حوكمەوە دوو خاڵی زۆر گرنگی تێیدا بەرجەستە بوو:
یەكەمیان سەلماندنی هەرێمی كوردستان وەك قەوارەیەكی فیدراڵ ‌و رەتكردنەوەی تێزی فیدراڵیی پارێزگاكان كە ئەو كاتە لەلایەن ئەمریكاییەكان ‌و هەندێك لە لایەنە عیراقییەكانیشەوە باسی لێ دەكرا.


دووەمیان: جگە لە داننان بە هەرێمی كوردستان ‌و حكومەت ‌و پەرلەمان ‌و یاساكانی ‌و دەزگا دادوەرییەكەی تا 19/3/2003 ، جگە لەوەش تێكەڵكردنی هەموو سنووری كوردستانی جنوبی بەو ناوچانەی بە كێشە لەسەر دانران چ لە مادەی 58 ی قانونی ئیدارەی دەوڵەت ‌و چ مادەی 140ی دەستووری هەمیشەیی.

هەر هاوكات لەگەڵ ئەو موناقەشە و كۆبوونەوانەی كە بەدرێژایی ساڵانی 2003 و 2004 لە نێوان مام جەلال و لایەنە سیاسییە عەرەبییەكانی عیراق، مام جەلال وتارێكی لە رۆژنامەی (شەرق ئەلئەوسەت) دا بڵاوكردەوە كە هەڵایەكی گەورەی نایەوە ‌و قسە  و باسی زۆری بەشوێن خۆیدا هێنا. لەنێوان رابەرانی بیری ناسیۆنالیزمی عەرەبی ‌و بەتایبەتی ناسرییەكان كە ئەوان بە پێشەنگی بیری ناسیۆنالیزمی عەرەبی هەژمار دەكرێن، لەو وتارەدا و مام بە راشكاوانە دەڵێت ئەو فیدرالییەی كوردستان مەزنە، فیدرالییەكی (عیملاقە) و ئەوە نییە كە لە چوارچێوەی ئیداریی بچووكدا پۆلێنی بكەن، هەروەها ئەو زنجیرە چاوپێكەوتنەی كە مام لەگەڵ سوبحی عەبدولحەمید دەیكات، كە یەكێكە لە مونەزیر ‌و بیرمەندە ناسرییەكانی عەرەب، سەرچاوەكەی ئەو موناقەشە و گفتۆگۆیەیە كە لە شەستەكانی سەدەی رابردووەوە مام جەلال لەگەڵ نەتەوەییە عەرەبەكان ‌و ناسرییەكاندا كردۆێتی و بۆی روونكردوونەتەوە كە كەركوك خاكی كوردستانە ‌و ئەو تێز ‌و تەرحانەی كە كەسانێكی ناسیۆنالسیتی عەربی وەكو هیلال ناجی دێتە سەر ئەو باوەڕەی كە دەڵێت: كەركوك بدەنەوە بە كوردەكان، ئەوە خاكی كوردستانە و خاكی ئەوانە و نەوت لە وڵاتە عەرەبییەكاندا زۆر زۆرە. واتە هاوكات لەو كاتەی كە مام جەلال لە مەجلیسی حوكمدا مورافەعەی دەكرد، لە چەند قۆڵێكی دیكەشەوە خەریكی مورافەعە بوو، لە رێگەی نووسینی وتاری سیاسی ‌و دیداری رۆژنامەنووسییشەوە مام جەلال مورافەعەی پێشكەش دەكرد.

وەلانانی تێزی فیدراڵی پارێزگاكان

هەروەها بیرۆكەی پێشكەش دەكرد تا لە گەشەپێدانی عیراقی دیموكراتیدا ئەو بابەتانە بخرێتە گفتوگۆوە، بەجۆرێك لە راڕەوەكانی سیاسیی عیراقدا ئەوەی بۆ تەرح دەكردن كە دەبێت هەرێمی كوردستان وەك یەك یەكەی سیاسی ‌و ئیداریی یەكگرتوو مامەڵەی لەگەڵدا بكرێت ‌و لە یاساو دەستووردا شوێنی بكرێتەوە، نەك وەك ئەوەی بكرێتە فیدرالیی پارێزگاكان كە ئەوكات بەشێكی زۆر لە لایەنە عیراقییەكان بیریان لێ دەكردەوە، واتە ئەو مورافەعە و بەرگرییەی كە مام جەلال لەسەر كوردستانی بوونی كەركوك پێشكەشی كرد، بابەتێك نییە تەنها تایبەت بێت بە كەركوك، بەڵكو بابەتێكە لە چوارچێوەی كۆی مەسەلەی كوردستان، كە دیاریكردنی چارەنووسی كەركوك، واتە دیاریكردنی سنووری كوردستان، واتە دیاریكردنی ئەو چوارچێوە سیاسییەی كوردستان لەڕووی مێژووییەوە، یان بە كورتی ‌و بە كوردی دەكرێت بڵێین ئەوەی مام جەلال تەرحی دەكرد، ئاشتكردنەوەی مێژوو و جوگرافیا بوو، واتا بە عیراقییەكانی دەوت: باشە با كوردستان بەشێك بێت لە عیراق، بەڵام با كۆی كوردستان بەشێك بێت لە عیراق، بۆچی ئێوە بەشێكی لێ دادەبڕن ئەگەر پێتانوایە عیراق وەك یەكەیەكی سیاسی پێكەوە دەمێنێتەوە؟ بۆیە وا باشتر كوردستان بەیەكچاو سەیر بكەن، نەك كەركوك ‌و هەندێك ناوچەی دیكەی لێ داببڕن، واتە بڵێن ئەم سێ پارێزگایەی سلێمانی ‌و هەولێر ‌و دهۆك كە سەدام حسێن دانی پێداناوە، هەر ئەوە كوردستانە، بۆیە ئێمە دەبێت ئەو پەیامەی مام جەلال وا بخوێنینەوە كە تەرحێكە بۆ تەواوی خاكی كوردستانی جنوبی، ئەوكاتە ئەگەر كوردستان لەگەڵ عیراقدا بوو، ئەوا وەك یەك یەكەی جوگرافی ‌و سیاسی دەكرێت لەگەڵ عیراقدا لە چوارچێوەی دەوڵەتێكی فیدرالیدا بێت.

ناسری و ناسیۆنالیستەكانی عەرەب و سەرەتای مورافەعەكە

كە دەڵێین ئەم مورافەعەیە لە شەستەكانی سەدەی رابردووەوە بەردەوامە، ئەوەیە كە سەرۆك مام جەلال لە كاتی مفاوەزاتی نێوان كورد ‌و حكومەتی عیراقی سەردەمی عەبدولسەلام عارف لەلایەك ‌و گفتوگۆی میسر و عیراق ‌و سوریا بۆ پێكهێنانی یەكێتیی عەرەبی كە لەوكاتەدا لەگەڵ وەفدی عیراقدا دەچێتە میسر و ئەوكاتە تەرحی ئەوە بۆ جەمال عەبدولناسر دەكات كە ئەگەر ئەوان دەیانەوێت ئەو یەكێتییە یەكێتییەكی فیدرالی بێت كە لەنێوان ئەو سێ وڵاتەدا دروستی بكەن، ئەوا بۆ ئەوەی كورد بكەنە پشتیوانی ئەو یەكێتییە، پێشنیاز دەكەم با كورد لەو یەكێتییەدا ببێتە فیدراڵیی چوارەم، كە ئەوكاتە كوردستانی سوریاش دەگرێتەوە. واتە ئەگەر لەو یەكێتییە عەرەبییەدا عیراق هەرێمێكە ‌و سوریا هەرێمێكە ‌و میسر هەرێمێكە، ئەوا با كوردستان ببێتە هەرێمی چوارەم. خۆ ئەگەر وەك یەك وڵاتی یەكگرتووش دەیكەن، ئەوا ئێمە پێشنیاز دەكەین كوردستان هەرێمێك بێك لەناو ئەو دەوڵەتە یەكگرتووەدا. 


واتە لەو كاتەی كە ناسیۆنالیزمی عەرەبی جەمال عەبدولناسری هەیە ‌و تەرحی یەكێتیی عەرەبی دەكات، كوردیش مام جەلالی هەیە كە تەرحی ئەوە بۆ عەبدولناسر دەكات كە بۆئەوەی ئێمەی كوردیش پشتیوانی ئەو یەكێتییە عەرەبییە بكەین و پێكەوە بەئاشتی بژین، ئەوا ئێمەش پێمانباشە بەڵام بە سەلماندی كوردستانیبوونی كەركوك ‌و كوردستانییەتی هەموو خاكی كوردستانی لە چوارچێوەی ئەو یەكێتییە عەرەبییەدا.

سەركردایەتی سیاسیی كورد جووڵەی مام جەلالانەی گەرەكە

ئێستا پێمانوایە لە پاش 18 ساڵ لەو مورافەعەیە سەرەتا دەبێت مادەی 140ی دەستوور بەرچاوڕوونییەكی باش بێت هەم بۆ لایەنی عیراق و بۆ سەركردایەتیی سیاسیی كوردستانیش بۆئەوەی كە ئەو مەسەلەیە بە رێوشوێنی دەستووریی خۆی چارەسەر بكرێت، جگە لەوەش ئەوە فیكرێكی سیاسیی مام جەلالانەی دەوێت بۆ بیركردنەوە و تەگبیركردن لە چۆنێتی چارەسەركردنی، چونكە ئەگەر دیقەت بدەین، رەهەندی مێژوویی هەمیشە لە تەرحەكانی مام جەلالدا، ئامادەیی هەیە، بۆنموونە لە كتێبی دیداری تەمەندا بڵاوكراوەتەوە دەڵێت: كە كاتێك لەگەڵ ناسیۆنالیستەكانی سوریادا قسەم كردووە پێیانوتووم "ئەگەر نەتەوەی كورد و نەتەوەی عەرەب پێكەوە هاوپەیمان بن ‌و پێكەوە كاربكەن، ئەوا ئەوكاتە دەتوانین خاك ‌و خەڵك بگۆڕینەوە"، واتە ئەو تێزەی كە ئێستا ئێمە پێی دەڵێن ناوچە دابڕێنراوەكان و چارەسەرەكەی ئەوەبێت كە عەرەبە هاوردەكان بڕۆنەوە و كورد بگەڕێتەوە، ئەوە تەرحێكی زۆر كۆنە، تەنانەت لە مفاوەزاتی 1984دا لە باسكردنی ئاساییكردنەوەی دۆخی كوردستاندا باسی ئەو بابەتانە كراوە، هەر لەو مفاوەزاتەدا وەرەقەی ئاساییكردنەوە هەیە كە ئەوكات لە راگەیاندنەكانی یەكێتیدا بڵاوكراوەتەوە و تێیدا هاتووە كە دەبێت كێشەی ئەو ناوچانە بەم شێوەیە چارەسەر بكرێت، پێش هەر شتێك سیاسەتی تەعریب رابگیرێت ‌و پرۆسەی ئاساییكردنەوە دەستپێبكات، هەر لەو رووەشەوە دەبێت ئاماژە بەوەش بدەین كە ئەگەر ئاساییكردنەوە لە 1984دا جێبەجێ بكرایە، ئەوا تەعریب بەو شێوەیە تەشەنەی نەدەكرد و زۆر نەدەبوو، یان ئەگەر لە 1991 ئاساییكردنەوە دەستپێبكرایە، بەو جۆرە زۆر نەدەبوو، یان لە 31ی ئابی 1996 مەخمور نەخرایەتە سەر سنووری عیراق، تەعریب بەو جۆرە تەشەنەی نەدەكرد و ئاساییكردنەوە ئاسانتر دەبوو، ئێستاش هەتا زووتر ئاساییكردنەوە بكرێت ‌و كەركوك بگەڕێتەوە سەر سروشتە مێژووییەكەی خۆی، بەو دەستپێشخەرییەی كە سەرۆك مام جەلال كردی، یان بەو ئەندێشەیەی كە لە فیكری مام جەلالدا هەبوو، پێموایە مەسەلەكانی عیراق ‌و كوردستانیش لە چارەسەر نزیك دەبنەوە،  بۆیە هیوادارم هەر یەكێتییەك لای خۆیەوە بە شێوازی پەرۆشیی مام جەلال ‌و هەر كوردێكی دڵسۆز بە هەر جۆرێك بۆی دەكرێت بەهەمان شێواز ‌و خەمخۆریی ژیرانە كار بۆ چارەسەر و كردنەوەی ئەو گرێ كوێرەیە بكات.

PUKMEDIA