شاناز ئیبراهیم ئەحمەد: ئاستی زانستی زانکۆکان بەرز بکرێنەوە

شاناز ئیبراهیم ئەحمەد و ژمارەیەک لەیاریدەدەرانی سەرۆکی زانکۆ و راگرانی کۆلێژەکانی زانکۆى سلێمانی، راپەڕین، چەرمۆ، پۆلیتەکنیک

خاتوو شاناز ئیبراهیم ئەحمەد رۆژى دووشەممە 23/1/2023 لەدوو دیدارى جیادا چاویکەوت بەژمارەیەک لەیاریدەدەرانی سەرۆکی زانکۆ و راگرانی کۆلێژەکانی زانکۆى سلێمانی، راپەڕین، چەرمۆ، پۆلیتەکنیک.

لەو دیدارانەدا خاتوو شاناز پیرۆزبایی لێکردن بەبۆنەى دەست بەکاربوونیانەوە و هیواى سەرکەوتنیشی بۆ خواستن لەو ئەرکە نوێیەیاندا، پشتگیری و پشتیوانی خۆشی بۆ سەرخستنی کاروبارەکانیان دەربڕی.

خاتوو شاناز رایگەیاند: "داواتان لێ دەکەم پلانی پێویست ئامادە بکەن بەپشت بەستن بەلێهاتوویی و شارەزایی و سەرچاوە مرۆییە بەردەستەکان و وەک یەک تیم کاربکەن بۆ بەرزکردنەوەى ئاستی زانستی زانکۆکان و پرۆسەى خوێندن وخزمەتکردنی خوێندکاران".
هاوکات خاتوو شاناز ئیبراهیم ئەحمەد گرنگی پێشخستنی سێکتەرى خوێندنی باڵاى دووپاتکردەوە وەک سێکتەرێکی گرنگ بۆ بەرەوپێشبردنی کۆمەڵگە و پەروەردەکردن و پێگەیاندنی کادری ئەکادیمی لێهاتووو لەپسپۆڕی جیاجیادا لەپێناو خزمەتکردنی کۆمەڵگە و بەرەوپێشبردنی وڵاتدا.

لەودیدارانەدا یاریدەدەرانی سەرۆکی زانکۆ و راگرانی کۆلێژەکانی زانکۆکانى سلێمانی، راپەڕین، چەرمۆ، پۆلیتەکنیک، پوختەیەکیان لەبارەى ئاستی زانکۆکان و کێشە و ئاستەنگەکان و پلانەکانیان بۆ تێپەڕاندنی ئەو دۆخە و پێشخستنی بوارەکە پێشکەش کرد، سوپاسى پێشوازی و پشتیوانییەکانی خاتوو شانازیشیان کرد.